ek junun kahiye use jo mere sar se nikla

ik junūñ kahiye use jo mire sar se niklā

varna matlab na koī arz-e-hunar se niklā

koī manzil na milī paañv jo ghar se niklā

phir safar pesh thā jab gard-e-safar se niklā

bach ke har-chand zamāne kī nazar se niklā

sāmne kū-e-malāmat thā jidhar se niklā

maiñ bahut duur kahīñ chhoḌ chukā thā us ko

qāfila phir mirī hasrat kā kidhar se niklā

uTh ke us bazm se aa jaanā kuchh āsān na thā

ek dīvār se niklā huuñ jo dar se niklā

mai-kada dekhā to yād-e-ġham-e-yārāñ aa.ī

jaam chhalkā to lahū zaḳhm-e-jigar se niklā

bhiiḌ ke ḳhauf se phir ghar kī taraf lauT aayā

ghar se jab shahr meñ tanhā.ī ke Dar se niklā

paḌ gayā vaqt to sadiyoñ ke bharam TuuT ga.e

kaam kuchh shaam se niklā na sahar se niklā

ek junun kahiye use jo mere sar se nikla

warna matlab na koi arz-e-hunar se nikla

koi manzil na mili panw jo ghar se nikla

phir safar pesh tha jab gard-e-safar se nikla

bach ke har-chand zamane ki nazar se nikla

samne ku-e-malamat tha jidhar se nikla

main bahut dur kahin chhoD chuka tha us ko

qafila phir meri hasrat ka kidhar se nikla

uTh ke us bazm se aa jaana kuchh aasan na tha

ek diwar se nikla hun jo dar se nikla

mai-kada dekha to yaad-e-gham-e-yaran aai

jam chhalka to lahu zaKHm-e-jigar se nikla

bhiD ke KHauf se phir ghar ki taraf lauT aaya

ghar se jab shahr mein tanhai ke Dar se nikla

paD gaya waqt to sadiyon ke bharam TuT gae

kaam kuchh sham se nikla na sahar se nikla