ek teri be-ruKHi se zamana KHafa hua

ik terī be-ruḳhī se zamāna ḳhafā huā

ai sañg-dil tujhe bhī ḳhabar hai ki kyā huā

daryūza-gar samajh ke to thī multafit hayāt

vo yuuñ kaho ki dāman-e-dil hī na vā huā

Duubā kuchh is tarah se mirā āftāb-e-dil

sab kuchh huā ye phir na sahar-āshnā huā

yuuñ us ke dar pe baiThe haiñ jaise yahīñ ke hoñ

haa.e ye dard-e-ishq jo zanjīr-e-pā huā

chhīnī hai ishq ne tab-o-tāb-e-dimāġh-o-dil

maiñ kaise shāh-zor se zor-āzmā huā

ghar se chalo to bāñdh ke sar se kafan chalo

shahr-e-vafā se dasht-e-fanā hai milā huā

dil de ke ḳhush huuñ maiñ ki hifāzat kā ġham gayā

tujh se qarīb hai vo jo mujh se judā huā

lab se lagā to bhuul ga.e ham ġham-e-hayāt

sāġhar meñ koī tujh sā hasīñ hai chhupā huā

pī ham ne ḳhuub 'arsh' kashīd-e-nigāh-o-dil

kis mai-kade kā dar thā jo ham par na vā huā

ek teri be-ruKHi se zamana KHafa hua

ai sang-dil tujhe bhi KHabar hai ki kya hua

daryuza-gar samajh ke to thi multafit hayat

wo yun kaho ki daman-e-dil hi na wa hua

Duba kuchh is tarah se mera aaftab-e-dil

sab kuchh hua ye phir na sahar-ashna hua

yun us ke dar pe baiThe hain jaise yahin ke hon

hae ye dard-e-ishq jo zanjir-e-pa hua

chhini hai ishq ne tab-o-tab-e-dimagh-o-dil

main kaise shah-zor se zor-azma hua

ghar se chalo to bandh ke sar se kafan chalo

shahr-e-wafa se dasht-e-fana hai mila hua

dil de ke KHush hun main ki hifazat ka gham gaya

tujh se qarib hai wo jo mujh se juda hua

lab se laga to bhul gae hum gham-e-hayat

saghar mein koi tujh sa hasin hai chhupa hua

pi hum ne KHub 'arsh' kashid-e-nigah-o-dil

kis mai-kade ka dar tha jo hum par na wa hua