is tamashe ka sabab warna kahan baqi hai

is tamāshe kā sabab varna kahāñ baaqī hai

ab bhī kuchh log haiñ zinda ki jahāñ baaqī hai

ahl-e-sahrā bhī baḌhe aate haiñ shahroñ kī taraf

saañs lene ko jahāñ sirf dhuāñ baaqī hai

zindagī umr ke us moḌ pe pahuñchī hai jahāñ

suud nāpaid hai ehsās-e-ziyāñ baaqī hai

DhūñDhtī rahtī hai har lamha nigāh-e-dahshat

aur kis shahr-e-mohabbat meñ amaañ baaqī hai

maiñ kabhī suud kā qaa.il bhī nahīñ thā lekin

zindagī aur batā kitnā ziyāñ baaqī hai

maar kar bhī mire qātil ko tasallī na huī

maiñ huā ḳhatm to kyuuñ nām-o-nishāñ baaqī hai

aisī ḳhushiyāñ to kitāboñ meñ mileñgī shāyad

ḳhatm ab ghar kā tasavvur hai makāñ baaqī hai

laakh 'āzar' raheñ tajdīd-e-ġhazal se lipTe

aaj bhī 'mīr' kā andāz-e-bayāñ baaqī hai

is tamashe ka sabab warna kahan baqi hai

ab bhi kuchh log hain zinda ki jahan baqi hai

ahl-e-sahra bhi baDhe aate hain shahron ki taraf

sans lene ko jahan sirf dhuan baqi hai

zindagi umr ke us moD pe pahunchi hai jahan

sud napaid hai ehsas-e-ziyan baqi hai

DhunDhti rahti hai har lamha nigah-e-dahshat

aur kis shahr-e-mohabbat mein aman baqi hai

main kabhi sud ka qail bhi nahin tha lekin

zindagi aur bata kitna ziyan baqi hai

mar kar bhi mere qatil ko tasalli na hui

main hua KHatm to kyun nam-o-nishan baqi hai

aisi KHushiyan to kitabon mein milengi shayad

KHatm ab ghar ka tasawwur hai makan baqi hai

lakh 'azar' rahen tajdid-e-ghazal se lipTe

aaj bhi 'mir' ka andaz-e-bayan baqi hai