jab tak ye mohabbat mein badnam nahin hota

jab tak ye mohabbat meñ badnām nahīñ hotā

is dil ke ta.iiñ hargiz ārām nahīñ hotā

aalam se hamārā kuchh maz.hab hī nirālā hai

ya.anī haiñ jahāñ ham vaañ islām nahīñ hotā

kab va.ada nahīñ kartīñ milne kā tirī āñkheñ

kis roz nigāhoñ meñ paiġhām nahīñ hotā

baal apne baḌhāte haiñ kis vāste dīvāne

kyā shahr-e-mohabbat meñ hajjām nahīñ hotā

miltā hai kabhī bosa ne gaalī hī paate haiñ

muddat huī kuchh ham ko in.aam nahīñ hotā

saaqī ke talattuf ne aalam ko chhakāyā hai

labrez hamārā hī ik jaam nahīñ hotā

kyuuñ tīrgī-e-tāl.e kuchh tū bhī nahīñ kartī

ye roz-e-musībat kā kyuuñ shaam nahīñ hotā

phir merī kamand us ne Daale hī tuḌā.ī hai

vo āhu-e-ram-ḳhurda phir raam nahīñ hotā

ne ishq ke qābil haiñ ne zohd ke darḳhur haiñ

ai 'mus.hafī' ab ham se kuchh kaam nahīñ hotā

jab tak ye mohabbat mein badnam nahin hota

is dil ke tain hargiz aaram nahin hota

aalam se hamara kuchh mazhab hi nirala hai

yani hain jahan hum wan islam nahin hota

kab wada nahin kartin milne ka teri aankhen

kis roz nigahon mein paigham nahin hota

baal apne baDhate hain kis waste diwane

kya shahr-e-mohabbat mein hajjam nahin hota

milta hai kabhi bosa ne gali hi pate hain

muddat hui kuchh hum ko inam nahin hota

saqi ke talattuf ne aalam ko chhakaya hai

labrez hamara hi ek jam nahin hota

kyun tirgi-e-tale kuchh tu bhi nahin karti

ye roz-e-musibat ka kyun sham nahin hota

phir meri kamand us ne Dale hi tuDai hai

wo aahu-e-ram-KHurda phir ram nahin hota

ne ishq ke qabil hain ne zohd ke darKHur hain

ai 'mushafi' ab hum se kuchh kaam nahin hota