jab yar ne uTha kar zulfon ke baal bandhe

jab yaar ne uThā kar zulfoñ ke baal bāñdhe

tab maiñ ne apne dil meñ lākhoñ ḳhayāl bāñdhe

do din meñ ham to rījhe ai vaa.e haal un kā

guzre haiñ jin ke dil ko yaañ māh-o-sāl bāñdhe

tār-e-nigah meñ us ke kyūñkar phañse na ye dil

āñkhoñ ne jis ke lākhoñ vahshī ġhazāl bāñdhe

jo kuchh hai rañg us kā so hai nazar meñ apnī

go jaama zard pahne yā chīra laal bāñdhe

tere hī sāmne kuchh bahke hai merā naala

varna nishāne ham ne maare haiñ baal bāñdhe

bose kī to hai ḳhvāhish par kahiye kyūñki us se

jis kā mizāj lab par harf-e-savāl bāñdhe

māroge kis ko jī se kis par kamar kasī hai

phirte ho kyuuñ pyāre talvār Dhaal bāñdhe

do-chār sher aage us ke paḌhe to bolā

mazmūñ ye tū ne apne kyā hasb-e-hāl bāñdhe

'saudā' jo un ne bāñdhā zulfoñ meñ dil sazā hai

sheroñ meñ us ke tū ne kyuuñ ḳhatt-o-ḳhāl bāñdhe

jab yar ne uTha kar zulfon ke baal bandhe

tab main ne apne dil mein lakhon KHayal bandhe

do din mein hum to rijhe ai wae haal un ka

guzre hain jin ke dil ko yan mah-o-sal bandhe

tar-e-nigah mein us ke kyunkar phanse na ye dil

aankhon ne jis ke lakhon wahshi ghazal bandhe

jo kuchh hai rang us ka so hai nazar mein apni

go jama zard pahne ya chira lal bandhe

tere hi samne kuchh bahke hai mera nala

warna nishane hum ne mare hain baal bandhe

bose ki to hai KHwahish par kahiye kyunki us se

jis ka mizaj lab par harf-e-sawal bandhe

maroge kis ko ji se kis par kamar kasi hai

phirte ho kyun pyare talwar Dhaal bandhe

do-chaar sher aage us ke paDhe to bola

mazmun ye tu ne apne kya hasb-e-haal bandhe

'sauda' jo un ne bandha zulfon mein dil saza hai

sheron mein us ke tu ne kyun KHatt-o-KHal bandhe