jahan-e-ghuncha-e-dil ka faqat chaTakna tha

jahān-e-ġhuncha-e-dil kā faqat chaTaknā thā

usī kī bū-e-pareshāñ vajūd-e-duniyā thā

ye kah ke kal koī be-iḳhtiyār rotā thā

vo ik nigāh sahī kyuuñ kisī ko dekhā thā

tanābeñ kūcha-e-qātil kī khiñchtī jaatī thiiñ

shahīd-e-teġh-e-adā meñ bhī zor kitnā thā

bas ik jhalak nazar aa.ī uḌe kalīm ke hosh

bas ik nigāh huī ḳhaak tūr-e-sīnā thā

har ik ke haath faqat ġhaflateñ thiiñ hosh-numā

ki apne aap se begāna-vār jiinā thā

yahī huā ki fareb-e-umīd-o-yās miTe

vo pā ga.e tire hāthoñ hameñ jo paanā thā

chaman meñ ġhuncha-e-gul khilkhilā ke murjhā.e

yahī vo the jinheñ hañs hañs ke jaan denā thā

nigāh-e-mehr meñ jis kī haiñ sad payām-e-fanā

usī kā ālam-e-ījād-o-nāz bejā thā

jahāñ tū jalva-numā thā laraztī thī duniyā

tire jamāl se kaisā jalāl paidā thā

hayāt-o-marg ke kuchh raaz khul ga.e hoñge

fasāna-e-shab-e-ġham varna dosto kyā thā

shab-e-adam kā fasāna gudāz sham-e-hayāt

sivā.e kaif-e-fanā merā mājrā kyā thā

kuchh aisī baat na thī terā duur ho jaanā

ye aur baat ki rah rah ke dard uThtā thā

na pūchh sūd-o-ziyāñ kārobār-e-ulfat ke

vagarna yuuñ to na paanā thā kuchh na khotā thā

lagāvTeñ vo tire husn-e-be-niyāz kī aah

maiñ terī bazm se jab nā-umīd uTThā thā

tujhe ham ai dil-e-dard-āshnā kahāñ DhūñDeñ

ham apne hosh meñ kab the koī jab uTThā thā

adam kā raaz sadā-e-shikast sāz-e-hayāt

hijāb-e-zīst bhī kitnā latīf pardā thā

ye iztirāb-o-sukūñ bhī thī ik fareb-e-hayāt

ki apne haal se begāna-vār jiinā thā

kahāñ pe chuuk huī tere be-qarāroñ se

zamāna dūsrī karvaT badalne vaalā thā

ye koī yaad hai ye bhī hai koī mahviyyat

tire ḳhayāl meñ tujh ko bhī bhuul jaanā thā

kahāñ kī choT ubhar aa.ī husn-e-tābāñ meñ

dam-e-nazāra vo ruḳh dard sā chamaktā thā

na pūchh ramz-o-kināyāt chashm-e-sāqī ke

bas ek hashr-e-ḳhamosh anjuman meñ barpā thā

chaman chaman thī gul-e-dāġh-e-ishq se hastī

usī kī nik.hat-e-barbād kā zamāna thā

vo thā mirā dil-e-ḳhūñ-gashta jis ke miTne se

bahār-e-bāġha-e-jināñ thī vajūd-e-duniyā thā

qasam hai bāda-kasho chashm-e-mast-e-sāqī kī

batāo haath se kyā jām-e-mai sañbhaltā thā

visāl us se maiñ chāhūñ kahāñ ye dil merā

ye ro rahā huuñ ki kyuuñ us ko maiñ ne dekhā thā

umiid yaas banī yaas phir umiid banī

us ik nazar meñ fareb-e-nigāh kitnā thā

ye soz-o-sāz-e-nihāñ thā vo soz-o-sāz-e-ayāñ

visāl-o-hijr meñ bas farq thā to itnā thā

shikast-e-sāz-e-chaman thī bahār-e-lāla-o-gul

ḳhizāñ machaltī thī ġhuncha jahāñ chaTaktā thā

har ek saañs hai tajdīd-e-yād-e-ayyāmī

guzar gayā vo zamāna jise guzarnā thā

na koī va.ada na koī yaqīñ na koī umiid

magar hameñ to tirā intizār karnā thā

kisī ke sabr ne be-sabr kar diyā sab ko

'firāq' naza.a meñ karvaT koī badaltā thā

jahan-e-ghuncha-e-dil ka faqat chaTakna tha

usi ki bu-e-pareshan wajud-e-duniya tha

ye kah ke kal koi be-iKHtiyar rota tha

wo ek nigah sahi kyun kisi ko dekha tha

tanaben kucha-e-qatil ki khinchti jati thin

shahid-e-tegh-e-ada mein bhi zor kitna tha

bas ek jhalak nazar aai uDe kalim ke hosh

bas ek nigah hui KHak tur-e-sina tha

har ek ke hath faqat ghaflaten thin hosh-numa

ki apne aap se begana-war jina tha

yahi hua ki fareb-e-umid-o-yas miTe

wo pa gae tere hathon hamein jo pana tha

chaman mein ghuncha-e-gul khilkhila ke murjhae

yahi wo the jinhen hans hans ke jaan dena tha

nigah-e-mehr mein jis ki hain sad payam-e-fana

usi ka aalam-e-ijad-o-naz beja tha

jahan tu jalwa-numa tha larazti thi duniya

tere jamal se kaisa jalal paida tha

hayat-o-marg ke kuchh raaz khul gae honge

fasana-e-shab-e-gham warna dosto kya tha

shab-e-adam ka fasana gudaz sham-e-hayat

siwae kaif-e-fana mera majra kya tha

kuchh aisi baat na thi tera dur ho jaana

ye aur baat ki rah rah ke dard uThta tha

na puchh sud-o-ziyan karobar-e-ulfat ke

wagarna yun to na pana tha kuchh na khota tha

lagawTen wo tere husn-e-be-niyaz ki aah

main teri bazm se jab na-umid uTTha tha

tujhe hum ai dil-e-dard-ashna kahan DhunDen

hum apne hosh mein kab the koi jab uTTha tha

adam ka raaz sada-e-shikast saz-e-hayat

hijab-e-zist bhi kitna latif parda tha

ye iztirab-o-sukun bhi thi ek fareb-e-hayat

ki apne haal se begana-war jina tha

kahan pe chuk hui tere be-qararon se

zamana dusri karwaT badalne wala tha

ye koi yaad hai ye bhi hai koi mahwiyyat

tere KHayal mein tujh ko bhi bhul jaana tha

kahan ki choT ubhar aai husn-e-taban mein

dam-e-nazara wo ruKH dard sa chamakta tha

na puchh ramz-o-kinayat chashm-e-saqi ke

bas ek hashr-e-KHamosh anjuman mein barpa tha

chaman chaman thi gul-e-dagh-e-ishq se hasti

usi ki nikhat-e-barbaad ka zamana tha

wo tha mera dil-e-KHun-gashta jis ke miTne se

bahaar-e-bagha-e-jinan thi wajud-e-duniya tha

qasam hai baada-kasho chashm-e-mast-e-saqi ki

batao hath se kya jam-e-mai sanbhalta tha

visal us se main chahun kahan ye dil mera

ye ro raha hun ki kyun us ko main ne dekha tha

umid yas bani yas phir umid bani

us ek nazar mein fareb-e-nigah kitna tha

ye soz-o-saz-e-nihan tha wo soz-o-saz-e-ayan

visal-o-hijr mein bas farq tha to itna tha

shikast-e-saz-e-chaman thi bahaar-e-lala-o-gul

KHizan machalti thi ghuncha jahan chaTakta tha

har ek sans hai tajdid-e-yaad-e-ayyami

guzar gaya wo zamana jise guzarna tha

na koi wada na koi yaqin na koi umid

magar hamein to tera intizar karna tha

kisi ke sabr ne be-sabr kar diya sab ko

'firaq' naza mein karwaT koi badalta tha