jite-ji ke aashna hain phir kisi ka kaun hai

jīte-jī ke āshnā haiñ phir kisī kā kaun hai

naam ke apne huā karte haiñ apnā kaun hai

jān-e-jāñ tere sivā rashk-e-masīhā kaun hai

maar kar Thokar jilā de mujh ko aisā kaun hai

ye siyah ḳhema hai kis kā is meñ lailā kaun hai

chamber-e-aflāk ke parde meñ baiThā kaun hai

ham na kahte the ki saudā zulf kā achchhā nahīñ

dekhiye to ab sar-e-bāzār rusvā kaun hai

vo to hai be-nūr aur ye nuur se mā'mūr hai

chashm ko nargis kahegā aisā andhā kaun hai

dam-ba-dam har baat meñ karte ho ThanDī garmiyāñ

aap kī ukhḌī huī bātoñ pe jamtā kaun hai

vādī-e-vahshat meñ bhī ham-rāh haiñ āh-o-fuġhāñ

apne hamdam saath haiñ ai jaan tanhā kaun hai

ḳhair hai ai mehrbāñ kis ne unheñ sīdhā kyā

aap kyuuñ bal karte haiñ zulfoñ se uljhā kaun hai

duḳhtar-e-raz sach batā terī nazar kis par paḌī

TaTTiyoñ kī aaḌ meñ se kis ko taakā kaun hai

aaj maqtal meñ khaḌe kahte haiñ vo ḳhanjar-ba-kaf

bol uTThe chāhne vaalā hamārā kaun hai

chaar din jo kuchh tamāshā dekhnā hai dekh le

sair ko phir gulshan-e-duniyā meñ aatā kaun hai

bāñdh kar teġh o kafan jaate haiñ us qātil ke paas

ham bhī dekheñ rokne vaalā hamārā kaun hai

kyā tajāhul hai ki vo farmāte haiñ aġhyār se

maiñ nahīñ pahchāntā mutlaq ki 'āġhā' kaun hai

jite-ji ke aashna hain phir kisi ka kaun hai

nam ke apne hua karte hain apna kaun hai

jaan-e-jaan tere siwa rashk-e-masiha kaun hai

mar kar Thokar jila de mujh ko aisa kaun hai

ye siyah KHema hai kis ka is mein laila kaun hai

chamber-e-aflak ke parde mein baiTha kaun hai

hum na kahte the ki sauda zulf ka achchha nahin

dekhiye to ab sar-e-bazar ruswa kaun hai

wo to hai be-nur aur ye nur se ma'mur hai

chashm ko nargis kahega aisa andha kaun hai

dam-ba-dam har baat mein karte ho ThanDi garmiyan

aap ki ukhDi hui baaton pe jamta kaun hai

wadi-e-wahshat mein bhi ham-rah hain aah-o-fughan

apne hamdam sath hain ai jaan tanha kaun hai

KHair hai ai mehrban kis ne unhen sidha kya

aap kyun bal karte hain zulfon se uljha kaun hai

duKHtar-e-raz sach bata teri nazar kis par paDi

TaTTiyon ki aaD mein se kis ko taka kaun hai

aaj maqtal mein khaDe kahte hain wo KHanjar-ba-kaf

bol uTThe chahne wala hamara kaun hai

chaar din jo kuchh tamasha dekhna hai dekh le

sair ko phir gulshan-e-duniya mein aata kaun hai

bandh kar tegh o kafan jate hain us qatil ke pas

hum bhi dekhen rokne wala hamara kaun hai

kya tajahul hai ki wo farmate hain aghyar se

main nahin pahchanta mutlaq ki 'agha' kaun hai