jo hai wo kyun hai aur jo nahin hai wo kyun nahin

jo hai vo kyuuñ hai aur jo nahīñ hai vo kyuuñ nahīñ

ye jaan luuñ abhī mujhe aisā junūñ nahīñ

maiñ kyā huuñ aur kyuuñ huuñ mujhe is se kyā ġharaz

is se bhī kyā ġharaz mujhe huuñ bhī ki huuñ nahīñ

maiñ chāhtā huuñ maut jo aa.e mirī taraf

maiñ maut ko gale se lagā luuñ marūñ nahīñ

jiine kī aarzū mujhe le aa.ī hai yahāñ

maiñ varna ek pal bhī yahāñ par rahūñ nahīñ

jis par hai kā.enāt kā har raaz āshkār

vo kah rahā hai haañ to maiñ kaise kahūñ nahīñ

'momin-miyāñ' ye kaam nahīñ hai ye ishq hai

kyā soch meñ paḌe ho karūñ yā karūñ nahīñ

jo hai wo kyun hai aur jo nahin hai wo kyun nahin

ye jaan lun abhi mujhe aisa junun nahin

main kya hun aur kyun hun mujhe is se kya gharaz

is se bhi kya gharaz mujhe hun bhi ki hun nahin

main chahta hun maut jo aae meri taraf

main maut ko gale se laga lun marun nahin

jine ki aarzu mujhe le aai hai yahan

main warna ek pal bhi yahan par rahun nahin

jis par hai kaenat ka har raaz aashkar

wo kah raha hai han to main kaise kahun nahin

'momin-miyan' ye kaam nahin hai ye ishq hai

kya soch mein paDe ho karun ya karun nahin