kabhi sunte hain aql-o-hosh ki aur kam bhi pite hain

kabhī sunte haiñ 'aql-o-hosh kī aur kam bhī piite haiñ

kabhī saaqī kī nazreñ dekh kar paiham bhī piite haiñ

kahāñ tum dostoñ ke sāmne bhī pī nahīñ sakte

kahāñ ham rū-ba-rū-e-nāseh-e-barham bhī piite haiñ

ḳhizāñ kī fasl ho roze ke ayyām-e-mubārak hoñ

tabī'at lahr par aa.ī to be-mausam bhī piite haiñ

tavāf-e-kā'ba be-kaifiyyat-e-mai ho nahīñ saktā

milā lete haiñ thoḌī sī agar zamzam bhī piite haiñ

kahāñ kī tauba kaisā ittiqā ahd-e-javānī meñ

agar samjho to aao tum bhī chakkho ham bhī piite haiñ

'nushūr' ālūda-e-isyāñ sahī phir kaun baaqī hai

ye bāteñ raaz kī haiñ qibla-e-ālam bhī piite haiñ

kabhi sunte hain 'aql-o-hosh ki aur kam bhi pite hain

kabhi saqi ki nazren dekh kar paiham bhi pite hain

kahan tum doston ke samne bhi pi nahin sakte

kahan hum ru-ba-ru-e-naseh-e-barham bhi pite hain

KHizan ki fasl ho roze ke ayyam-e-mubarak hon

tabi'at lahr par aai to be-mausam bhi pite hain

tawaf-e-ka'ba be-kaifiyyat-e-mai ho nahin sakta

mila lete hain thoDi si agar zamzam bhi pite hain

kahan ki tauba kaisa ittiqa ahd-e-jawani mein

agar samjho to aao tum bhi chakkho hum bhi pite hain

'nushur' aaluda-e-isyan sahi phir kaun baqi hai

ye baaten raaz ki hain qibla-e-alam bhi pite hain