kah bhi dun haal-e-dil agar shayad

kah bhī duuñ hāl-e-dil agar shāyad

un pe ho jaa.e kuchh asar shāyad

ab zamāna hai bevafā.ī kā

siikh leñ ham bhī ye hunar shāyad

ba.ad muddat ke ye ḳhayāl aayā

raas aayā nahīñ safar shāyad

ham hī ab tak samajh nahīñ paa.e

kuchh to kahtī hai vo nazar shāyad

vaise to fāsla nahīñ koī

kashmakash hai agar magar shāyad

har nazāre meñ us kā hī jalva

tum ko aatā nahīñ nazar shāyad

ajnabī ajnabī se chehre haiñ

ye nahīñ hai mirā nagar shāyad

niiñd taarī hai āsmānoñ par

yā duā meñ nahīñ asar shāyad

ab koī aarzū nahīñ baaqī

ḳhatm hotā hai ye safar shāyad

mauj-dar-mauj ek nashsha thā

ab vo dariyā gayā utar shāyad

zindagī ab tujhe sañvāre kyā

koshisheñ saarī be-asar shāyad

ik jahāñ ajnabī rahā 'mītā'

ik jahāñ mujh se bā-ḳhabar shāyad

kah bhi dun haal-e-dil agar shayad

un pe ho jae kuchh asar shayad

ab zamana hai bewafai ka

sikh len hum bhi ye hunar shayad

baad muddat ke ye KHayal aaya

ras aaya nahin safar shayad

hum hi ab tak samajh nahin pae

kuchh to kahti hai wo nazar shayad

waise to fasla nahin koi

kashmakash hai agar magar shayad

har nazare mein us ka hi jalwa

tum ko aata nahin nazar shayad

ajnabi ajnabi se chehre hain

ye nahin hai mera nagar shayad

nind tari hai aasmanon par

ya dua mein nahin asar shayad

ab koi aarzu nahin baqi

KHatm hota hai ye safar shayad

mauj-dar-mauj ek nashsha tha

ab wo dariya gaya utar shayad

zindagi ab tujhe sanware kya

koshishen sari be-asar shayad

ek jahan ajnabi raha 'mita'

ek jahan mujh se ba-KHabar shayad