kahan tak jafa husn walon ki sahte

kahāñ tak jafā husn vāloñ kī sahte

javānī jo rahtī to phir ham na rahte

lahū thā tamannā kā aañsū nahīñ the

bahā.e na jaate to hargiz na bahte

vafā bhī na hotā to achchhā thā va.ada

ghaḌī do ghaḌī to kabhī shaad rahte

hujūm-e-tamannā se ghuTte the dil meñ

jo maiñ roktā bhī to naale na rahte

maiñ jāgūñgā kab tak vo so.eñ ge tā-kai

kabhī chīḳh uTThūñgā ġham sahte sahte

batāte haiñ aañsū ki ab dil nahīñ hai

jo paanī na hotā to dariyā na bahte

zamāna baḌe shauq se sun rahā thā

hamīñ so ga.e dāstāñ kahte kahte

koī naqsh aur koī dīvār samjhā

zamāna huā mujh ko chup rahte rahte

mirī naav is ġham ke dariyā meñ 'sāqib'

kināre pe aa hī lagī bahte bahte

kahan tak jafa husn walon ki sahte

jawani jo rahti to phir hum na rahte

lahu tha tamanna ka aansu nahin the

bahae na jate to hargiz na bahte

wafa bhi na hota to achchha tha wada

ghaDi do ghaDi to kabhi shad rahte

hujum-e-tamanna se ghuTte the dil mein

jo main rokta bhi to nale na rahte

main jagunga kab tak wo soen ge ta-kai

kabhi chiKH uTThunga gham sahte sahte

batate hain aansu ki ab dil nahin hai

jo pani na hota to dariya na bahte

zamana baDe shauq se sun raha tha

hamin so gae dastan kahte kahte

koi naqsh aur koi diwar samjha

zamana hua mujh ko chup rahte rahte

meri naw is gham ke dariya mein 'saqib'

kinare pe aa hi lagi bahte bahte