kaun kahta hai nasim-e-sahari aati hai

kaun kahtā hai nasīm-e-saharī aatī hai

nik.hat-e-gul meñ basī ek parī aatī hai

shauq se zulm karo shauq se do tum āzār

ye samajh lo mujhe bhī nauhagarī aatī hai

koī kahtā hai ki aatā hai dukhānā dil kā

koī kahtā hai tumheñ chāragarī aatī hai

dard-e-ulfat ko baḌhā kar vo ghaTā dete haiñ

chaak dil kyuuñ na kareñ baḳhiya-garī aatī hai

jhuuT se mujh ko na matlab na banāvaT se kaam

baat jo aatī hai muñh par vo kharī aatī hai

zor se saañs jo letā huuñ to aksar shab-e-ġham

dil kī āvāz 'ajab dard bharī aatī hai

dast-e-vahshat kā mire shuġhl vo kyā pūchhte haiñ

kuchh nahīñ aatā faqat jāma-darī aatī hai

kaam karne ke salīqe se ham āgāh nahīñ

aur kyā aatā hai bas be-hunarī aatī hai

dil-e-pazh-murda khilā jaatā hai kyuuñ aaj bashīr

aa ga.ī hai koī yā ḳhush-ḳhabarī aatī hai

kaun kahta hai nasim-e-sahari aati hai

nikhat-e-gul mein basi ek pari aati hai

shauq se zulm karo shauq se do tum aazar

ye samajh lo mujhe bhi nauhagari aati hai

koi kahta hai ki aata hai dukhana dil ka

koi kahta hai tumhein chaaragari aati hai

dard-e-ulfat ko baDha kar wo ghaTa dete hain

chaak dil kyun na karen baKHiya-gari aati hai

jhuT se mujh ko na matlab na banawaT se kaam

baat jo aati hai munh par wo khari aati hai

zor se sans jo leta hun to aksar shab-e-gham

dil ki aawaz 'ajab dard bhari aati hai

dast-e-wahshat ka mere shughl wo kya puchhte hain

kuchh nahin aata faqat jama-dari aati hai

kaam karne ke saliqe se hum aagah nahin

aur kya aata hai bas be-hunari aati hai

dil-e-pazh-murda khila jata hai kyun aaj bashir

aa gai hai koi ya KHush-KHabari aati hai