KHud ko pane ki talab mein aarzu uski bhi thi

ḳhud ko paane kī talab meñ aarzū us kī bhī thī

maiñ jo mil jaatā to us meñ aabrū us kī bhī thī

zindagī ik dūsre ko DhūñDne meñ kaT ga.ī

justujū merī bhī dushman thī adū us kī bhī thī

merī bātoñ meñ bhī talḳhī thī sam-e-tanhā.ī kī

zahr-e-tanhā.ī meñ Duubī guftugū us kī bhī thī

vo gayā to karvaTeñ le le ke pahlū thak ga.e

kis tarah sotā mire sāñsoñ meñ bū us kī bhī thī

raat bhar āñkhoñ meñ us kā marmarīñ paikar rahā

chāñdnī ke jhilmilāne meñ numū us kī bhī thī

ghar se us kā bhī nikalnā ho gayā āḳhir muhāl

merī rusvā.ī se shohrat kū-ba-kū us kī bhī thī

maiñ huā ḳhā.if to us ke bhī uḌe hosh-o-havās

merī jo sūrat huī vo hū-ba-hū us kī bhī thī

kuchh mujhe bhī sīdhe-sādhe rāstoñ se bair hai

kuchh bhaTak jaane ke baa.is justujū us kī bhī thī

vo jise saare zamāne ne kahā merā raqīb

maiñ ne us ko ham-safar jaanā ki tū us kī bhī thī

dasht-e-furqat kā safar bhī āḳhirash tai ho gayā

aur kuchh din saath detā aarzū us kī bhī thī

baat baḌhne ko to baḌh jaatī bahut lekin 'nazar'

maiñ bhī kuchh kam-go thā chup rahne kī ḳhū us kī bhī thī

KHud ko pane ki talab mein aarzu us ki bhi thi

main jo mil jata to us mein aabru us ki bhi thi

zindagi ek dusre ko DhunDne mein kaT gai

justuju meri bhi dushman thi adu us ki bhi thi

meri baaton mein bhi talKHi thi sam-e-tanhai ki

zahr-e-tanhai mein Dubi guftugu us ki bhi thi

wo gaya to karwaTen le le ke pahlu thak gae

kis tarah sota mere sanson mein bu us ki bhi thi

raat bhar aankhon mein us ka marmarin paikar raha

chandni ke jhilmilane mein numu us ki bhi thi

ghar se us ka bhi nikalna ho gaya aaKHir muhaal

meri ruswai se shohrat ku-ba-ku us ki bhi thi

main hua KHaif to us ke bhi uDe hosh-o-hawas

meri jo surat hui wo hu-ba-hu us ki bhi thi

kuchh mujhe bhi sidhe-sadhe raston se bair hai

kuchh bhaTak jaane ke bais justuju us ki bhi thi

wo jise sare zamane ne kaha mera raqib

main ne us ko ham-safar jaana ki tu us ki bhi thi

dasht-e-furqat ka safar bhi aaKHirash tai ho gaya

aur kuchh din sath deta aarzu us ki bhi thi

baat baDhne ko to baDh jati bahut lekin 'nazar'

main bhi kuchh kam-go tha chup rahne ki KHu us ki bhi thi