KHuda jab tak na chahe aadmi se kuchh nahin hota

ḳhudā jab tak na chāhe aadmī se kuchh nahīñ hotā

mujhe ma.alūm hai merī ḳhushī se kuchh nahīñ hotā

mohabbat jazba-e-īsār se parvān chaḌhtī hai

ḳhulūs-e-dil na ho to dostī se kuchh nahīñ hotā

vahāñ terā karam terā bharosa kaam aatā hai

jahāñ majbūr ho kar aadmī se kuchh nahīñ hotā

ziyā-e-shams bhī maujūd hai nūr-e-qamar bhī hai

basīrat hī na ho to raushnī se kuchh nahīñ hotā

ġharaz tere sivā har ek ko majbūr paatā huuñ

bharosa jis pe kartā huuñ usī se kuchh nahīñ hotā

ḳhud apne haal se uljhe hue haiñ tere dīvāne

hañse jaa.e zamāne kī hañsī se kuchh nahīñ hotā

mohabbat bad-gumāñ ho jaa.e to zinda nahīñ rahtī

asar dil par tumhārī be-ruḳhī se kuchh nahīñ hotā

KHuda jab tak na chahe aadmi se kuchh nahin hota

mujhe malum hai meri KHushi se kuchh nahin hota

mohabbat jazba-e-isar se parwan chaDhti hai

KHulus-e-dil na ho to dosti se kuchh nahin hota

wahan tera karam tera bharosa kaam aata hai

jahan majbur ho kar aadmi se kuchh nahin hota

ziya-e-shams bhi maujud hai nur-e-qamar bhi hai

basirat hi na ho to raushni se kuchh nahin hota

gharaz tere siwa har ek ko majbur pata hun

bharosa jis pe karta hun usi se kuchh nahin hota

KHud apne haal se uljhe hue hain tere diwane

hanse jae zamane ki hansi se kuchh nahin hota

mohabbat bad-guman ho jae to zinda nahin rahti

asar dil par tumhaari be-ruKHi se kuchh nahin hota