KHwab ka rishta haqiqat se na joDa jae

ḳhvāb kā rishta haqīqat se na joḌā jaa.e

ā.īna hai ise patthar se na toḌā jaa.e

ab bhī bhar sakte haiñ mai-ḳhāne ke sab jām-o-subū

merā bhīgā huā dāman jo nichoḌā jaa.e

har qadam marhala-e-marg-e-tamannā hai magar

zindagī phir bhī tirā saath na chhoḌā jaa.e

aao phir aaj kuredeñ dil-e-afsurda kī raakh

aao soī huī yādoñ ko jhiñjhoḌā jaa.e

ho vo tauba ke ho sāġhar ke ho paimān-e-vafā

kuchh na kuchh aaj to mai-ḳhāne meñ toḌā jaa.e

zulf o ruḳh aaj bhī unvān-e-ġhazal haiñ 'manzūr'

ruḳh udhar gardish-e-ayyām kā moḌā jaa.e

KHwab ka rishta haqiqat se na joDa jae

aaina hai ise patthar se na toDa jae

ab bhi bhar sakte hain mai-KHane ke sab jam-o-subu

mera bhiga hua daman jo nichoDa jae

har qadam marhala-e-marg-e-tamanna hai magar

zindagi phir bhi tera sath na chhoDa jae

aao phir aaj kureden dil-e-afsurda ki rakh

aao soi hui yaadon ko jhinjhoDa jae

ho wo tauba ke ho saghar ke ho paiman-e-wafa

kuchh na kuchh aaj to mai-KHane mein toDa jae

zulf o ruKH aaj bhi unwan-e-ghazal hain 'manzur'

ruKH udhar gardish-e-ayyam ka moDa jae