kis ko mili taskin-e-sahil kis ne sar manjdhaar kiya

kis ko milī taskīn-e-sāhil kis ne sar mañjdhār kiyā

us tūfān se guzre jis ne nadī nadī ko paar kiyā

ai farzāno! dīvānoñ ke jazba-e-dil kī qadr karo

un kī ek nazar ne ātish ātish ko gulzār kiyā

rañj-e-mohabbat rañj-e-zamāna donoñ ham se ḳhā.if haiñ

ham ne soch samajh kar dil ko sargarm-e-paikār kiyā

sahrā sahrā ham ne nok-e-ḳhār se talve sahlā.e

mahfil mahfil ham ne apnī vahshat kā iqrār kiyā

un se kah do sāmne aa kar apne jalve aam kareñ

ḳhalvat-e-nāz meñ chhup na sakeñge ham ne agar isrār kiyā

ham ne apne ishq kī ḳhātir zanjīreñ bhī dekhīñ haiñ

ham ne un ke husn kī ḳhātir raqs bhī zer-e-dār kiyā

bastī bastī aaj hamārī sa.ī-e-vafā kī shohrat hai

ham ne 'zahīr' ik aalam ko pāband-e-nigāh-e-yār kiyā

kis ko mili taskin-e-sahil kis ne sar manjdhaar kiya

us tufan se guzre jis ne nadi nadi ko par kiya

ai farzano! diwanon ke jazba-e-dil ki qadr karo

un ki ek nazar ne aatish aatish ko gulzar kiya

ranj-e-mohabbat ranj-e-zamana donon hum se KHaif hain

hum ne soch samajh kar dil ko sargarm-e-paikar kiya

sahra sahra hum ne nok-e-KHar se talwe sahlae

mahfil mahfil hum ne apni wahshat ka iqrar kiya

un se kah do samne aa kar apne jalwe aam karen

KHalwat-e-naz mein chhup na sakenge hum ne agar israr kiya

hum ne apne ishq ki KHatir zanjiren bhi dekhin hain

hum ne un ke husn ki KHatir raqs bhi zer-e-dar kiya

basti basti aaj hamari sai-e-wafa ki shohrat hai

hum ne 'zahir' ek aalam ko paband-e-nigah-e-yar kiya