koi chaara nahin dua ke siwa

koī chārā nahīñ duā ke sivā

koī suntā nahīñ ḳhudā ke sivā

mujh se kyā ho sakā vafā ke sivā

mujh ko miltā bhī kyā sazā ke sivā

bar-sar-e-sāhil murād yahāñ

koī ubhrā hai nāḳhudā ke sivā

koī bhī to dikhāo manzil par

jis ko dekhā ho rahnumā ke sivā

dil sabhī kuchh zabān par laayā

ik faqat arz-e-mudda.ā ke sivā

koī raazī na rah sakā mujh se

mere allāh tirī razā ke sivā

but-kade se chale ho kaabe ko

kyā milegā tumheñ ḳhudā ke sivā

dostoñ ke ye muḳhlisāna tiir

kuchh nahīñ merī hī ḳhatā ke sivā

mehr o mah se buland ho kar bhī

nazar aayā na kuchh ḳhalā ke sivā

ai 'hafīz' aah aah par āḳhir

kyā kaheñ dost vaah vā ke sivā

koi chaara nahin dua ke siwa

koi sunta nahin KHuda ke siwa

mujh se kya ho saka wafa ke siwa

mujh ko milta bhi kya saza ke siwa

bar-sar-e-sahil murad yahan

koi ubhra hai naKHuda ke siwa

koi bhi to dikhao manzil par

jis ko dekha ho rahnuma ke siwa

dil sabhi kuchh zaban par laya

ek faqat arz-e-muddaa ke siwa

koi raazi na rah saka mujh se

mere allah teri raza ke siwa

but-kade se chale ho kabe ko

kya milega tumhein KHuda ke siwa

doston ke ye muKHlisana tir

kuchh nahin meri hi KHata ke siwa

mehr o mah se buland ho kar bhi

nazar aaya na kuchh KHala ke siwa

ai 'hafiz' aah aah par aaKHir

kya kahen dost wah wa ke siwa