kuchh harf o suKHan pahle to aKHbar mein aaya

kuchh harf o suḳhan pahle to aḳhbār meñ aayā

phir 'ishq mirā kūcha o bāzār meñ aayā

ab āḳhir-e-shab dard kā bhaTkā huā rahvār

aayā bhī to shahr-e-lab-o-ruḳhsār meñ aayā

kyā naqsh huā dil ke añdhere meñ numūdār

kyā rozan-e-raushan mirī dīvār meñ aayā

hairāñ huuñ ki phir us ne na kī sabr kī tākīd

baazū jo mirā bāzu-e-dildār meñ aayā

ye ā.ina-guftār koī aur hai mujh meñ

sochā bhī na thā maiñ ne jo iz.hār meñ aayā

hāsil na huā mujh ko vo mahtāb to mā'būd

kyā farq tire sābit o sayyār meñ aayā

kuchh harf o suKHan pahle to aKHbar mein aaya

phir 'ishq mera kucha o bazar mein aaya

ab aaKHir-e-shab dard ka bhaTka hua rahwar

aaya bhi to shahr-e-lab-o-ruKHsar mein aaya

kya naqsh hua dil ke andhere mein numudar

kya rozan-e-raushan meri diwar mein aaya

hairan hun ki phir us ne na ki sabr ki takid

bazu jo mera bazu-e-dildar mein aaya

ye aaina-guftar koi aur hai mujh mein

socha bhi na tha main ne jo izhaar mein aaya

hasil na hua mujh ko wo mahtab to ma'bud

kya farq tere sabit o sayyar mein aaya