kuchh kahe jata tha gharq apne hi afsane mein tha

kuchh kahe jaatā thā ġharq apne hī afsāne meñ thā

marte marte hosh baaqī tere dīvāne meñ thā

haa.e vo ḳhud-raftagī uljhe hue sab sar ke baal

vo kisī meñ ab kahāñ jo tere dīvāne meñ thā

jis taraf jaa.e nazar apnā hī jalva thā ayaañ

jism meñ ham the ki vahshī ā.īna-ḳhāne meñ thā

boriyā thā kuchh shabīna mai thī yā TuuTe subū

aur kyā is ke sivā mastoñ ke vīrāne meñ thā

hañste hañste ro diyā karte the sab be-iḳhtiyār

ik na.ī tarkīb kā dard apne afsāne meñ thā

sun chuke jab haal merā le ke añgḌā.ī kahā

kis ġhazab kā dard zālim tere afsāne meñ thā

duun kī letā to hai zāhid magar maiñ kyā kahūñ

muttaqī saaqī se baḌh kar kaun mai-ḳhāne meñ thā

paas thā zanjīr tak kā tauq par kyā munhasir

vo kisī meñ ab kahāñ jo tere dīvāne meñ thā

der tak maiñ TakTakī bāñdhe hue dekhā kiyā

chehra-e-sāqiī numāyāñ saaf paimāne meñ thā

haa.e parvāne kā vo jalnā vo ronā sham' kā

maiñ ne rokā varna kyā aañsū nikal aane meñ thā

ḳhud-ġharaz duniyā kī hālat qābil-e-ibrat thī 'shād'

lutf milne kā na apne meñ na begāne meñ thā

'shād' kuchh pūchho na mujh se mere dil ke daaġh ko

TimTimātā sā charāġh ik apne vīrāne meñ thā

kuchh kahe jata tha gharq apne hi afsane mein tha

marte marte hosh baqi tere diwane mein tha

hae wo KHud-raftagi uljhe hue sab sar ke baal

wo kisi mein ab kahan jo tere diwane mein tha

jis taraf jae nazar apna hi jalwa tha ayan

jism mein hum the ki wahshi aaina-KHane mein tha

boriya tha kuchh shabina mai thi ya TuTe subu

aur kya is ke siwa maston ke virane mein tha

hanste hanste ro diya karte the sab be-iKHtiyar

ek nai tarkib ka dard apne afsane mein tha

sun chuke jab haal mera le ke angDai kaha

kis ghazab ka dard zalim tere afsane mein tha

dun ki leta to hai zahid magar main kya kahun

muttaqi saqi se baDh kar kaun mai-KHane mein tha

pas tha zanjir tak ka tauq par kya munhasir

wo kisi mein ab kahan jo tere diwane mein tha

der tak main TakTaki bandhe hue dekha kiya

chehra-e-saqii numayan saf paimane mein tha

hae parwane ka wo jalna wo rona sham' ka

main ne roka warna kya aansu nikal aane mein tha

KHud-gharaz duniya ki haalat qabil-e-ibrat thi 'shad'

lutf milne ka na apne mein na begane mein tha

'shad' kuchh puchho na mujh se mere dil ke dagh ko

TimTimata sa charagh ek apne virane mein tha