kya gharaz lakh KHudai mein hon daulat wale

kyā ġharaz laakh ḳhudā.ī meñ hoñ daulat vaale

un kā banda huuñ jo bande haiñ mohabbat vaale

chāheñ gar chāra jarāhat kā mohabbat vaale

becheñ almās o namak sañg-e-jarāhat vaale

ga.e jannat meñ agar soz-e-mohabbat vaale

to ye jaano rahe dozaḳh hī meñ jannat vaale

sāqiyā hoñ jo subūhī kī na 'ādat vaale

sub.h-e-mahshar ko bhī uTTheñ na tire matvāle

duḳhtar-e-raz ko nahīñ chheḌte haiñ matvāle

hazar us fāhisha se karte haiñ hurmat vaale

rahe juuñ shīsha-e-sā.at vo mukaddar donoñ

kabhī mil bhī ga.e do dil jo kudūrat vaale

kis maraz kī haiñ davā ye lab-e-jāñ-baḳhsh tire

jāñ-ba-lab haiñ tire āzār-e-mohabbat vaale

hirs ke phailte haiñ paañv ba-qadr-e-us.at

tañg hī rahte haiñ duniyā meñ farāġhat vaale

haa.e re hasrat-e-dīdār mirī haa.e ko bhī

likhte haiñ hā-e-do-chashmī se kitābat vaale

nahīñ juz sham' mujāvir mirī bālīn-e-mazār

nahīñ juz kasrat-e-parvāna ziyārat vaale

na shikāyat hai karam kī na sitam kī ḳhvāhish

dekh to ham bhī haiñ kyā sabr o qanā'at vaale

kyā tamāshā hai ki misl-e-mah-e-nau apnā faroġh

jānte apnī hiqārat ko haiñ shohrat vaale

dil se kuchh kahtā huuñ maiñ mujh se hai kuchh kahtā dil

donoñ ik haal meñ haiñ ranj o musībat vaale

tū gar aa jaa.e to ai dard-e-mohabbat kī davā

mire hamdard hoñ bedard fazīhat vaale

chhoḌ dete haiñ qalam juuñ qalam-e-ātish-bāz

mirī sharh-e-tapish-e-dil kī kitābat vaale

kabhī afsos hai aatā kabhī ronā aatā

dil-e-bīmār ke haiñ do hī 'ayādat vaale

tū mire haal se ġhāfil hai par ai ġhaflat-kesh

tere andāz-e-taġhāful nahīñ ġhaflat vaale

ham ne dekhā hai jo us but meñ nahīñ kah sakte

ki mubādā kahīñ sun paa.eñ sharī'at vaale

naaz hai gul ko nazākat pe chaman meñ ai 'zauq'

us ne dekhe hī nahīñ nāz-o-nazākat vaale

kya gharaz lakh KHudai mein hon daulat wale

un ka banda hun jo bande hain mohabbat wale

chahen gar chaara jarahat ka mohabbat wale

bechen almas o namak sang-e-jarahat wale

gae jannat mein agar soz-e-mohabbat wale

to ye jaano rahe dozaKH hi mein jannat wale

saqiya hon jo subuhi ki na 'adat wale

subh-e-mahshar ko bhi uTThen na tere matwale

duKHtar-e-raz ko nahin chheDte hain matwale

hazar us fahisha se karte hain hurmat wale

rahe jun shisha-e-saat wo mukaddar donon

kabhi mil bhi gae do dil jo kudurat wale

kis maraz ki hain dawa ye lab-e-jaan-baKHsh tere

jaan-ba-lab hain tere aazar-e-mohabbat wale

hirs ke phailte hain panw ba-qadr-e-usat

tang hi rahte hain duniya mein faraghat wale

hae re hasrat-e-didar meri hae ko bhi

likhte hain ha-e-do-chashmi se kitabat wale

nahin juz sham' mujawir meri baalin-e-mazar

nahin juz kasrat-e-parwana ziyarat wale

na shikayat hai karam ki na sitam ki KHwahish

dekh to hum bhi hain kya sabr o qana'at wale

kya tamasha hai ki misl-e-mah-e-nau apna farogh

jaante apni hiqarat ko hain shohrat wale

dil se kuchh kahta hun main mujh se hai kuchh kahta dil

donon ek haal mein hain ranj o musibat wale

tu gar aa jae to ai dard-e-mohabbat ki dawa

mere hamdard hon bedard fazihat wale

chhoD dete hain qalam jun qalam-e-atish-baz

meri sharh-e-tapish-e-dil ki kitabat wale

kabhi afsos hai aata kabhi rona aata

dil-e-bimar ke hain do hi 'ayaadat wale

tu mere haal se ghafil hai par ai ghaflat-kesh

tere andaz-e-taghaful nahin ghaflat wale

hum ne dekha hai jo us but mein nahin kah sakte

ki mubaada kahin sun paen shari'at wale

naz hai gul ko nazakat pe chaman mein ai 'zauq'

us ne dekhe hi nahin naz-o-nazakat wale