kya hue baad-e-bayaban ke pukare hue log

kyā hue bād-e-bayābāñ ke pukāre hue log

chāk-dar-chāk garebāñ ko sañvāre hue log

ḳhuuñ huā dil ki pashemān-e-sadāqat hai vafā

ḳhush huā jī ki chalo aaj tumhāre hue log

ye bhī kyā rañg hai ai nargis-e-ḳhvāb-ālūda

shahr meñ sab tire jaadū ke haiñ maare hue log

ḳhatt-e-māzūlī-e-arbāb-e-sitam khīñch ga.e

ye rasan-basta salīboñ se utāre hue log

vaqt hī vo ḳhat-e-fāsil hai ki ai ham-nafaso

duur hai mauj-e-balā aur kināre hue log

ai harīfān-e-ġham-e-gardish-e-ayyām aao

ek hī ġhol ke ham log haiñ haare hue log

un ko ai narm havā ḳhvāb-e-junūñ se na jagā

raat mai-ḳhāne kī aa.e haiñ guzāre hue log

kya hue baad-e-bayaban ke pukare hue log

chaak-dar-chaak gareban ko sanware hue log

KHun hua dil ki pasheman-e-sadaqat hai wafa

KHush hua ji ki chalo aaj tumhaare hue log

ye bhi kya rang hai ai nargis-e-KHwab-aluda

shahr mein sab tere jadu ke hain mare hue log

KHatt-e-mazuli-e-arbab-e-sitam khinch gae

ye rasan-basta salibon se utare hue log

waqt hi wo KHat-e-fasil hai ki ai ham-nafaso

dur hai mauj-e-bala aur kinare hue log

ai harifan-e-gham-e-gardish-e-ayyam aao

ek hi ghol ke hum log hain haare hue log

un ko ai narm hawa KHwab-e-junun se na jaga

raat mai-KHane ki aae hain guzare hue log