lipaT ke soch se ninden haram karti hai

lipaT ke soch se nīñdeñ harām kartī hai

tamām shab tirī hasrat kalām kartī hai

hamī vo ilm ke raushan charāġh haiñ jin ko

havā bujhātī nahīñ hai salām kartī hai

kisī bhī taur sikhātī nahīñ hai āzādī

mire huzūr mohabbat ġhulām kartī hai

ye sar-ba-sajda kahā nek-dil tavā.if ne

ḳhudāyā shukr ki beTī bhī kaam kartī hai

fanā kī jhiil meñ jis tarah vaqt rahtā hai

kuchh is tarah se vo mujh meñ qiyām kartī hai

charāġh-e-muflis-o-bebas kā haal ho jaise

hamāre saath kuchh aisā hī shaam kartī hai

havā-o-hirs kī la.anat kā kyā kareñ 'ḳhālid'

tirī talab ko salīqe se raam kartī hai

lipaT ke soch se ninden haram karti hai

tamam shab teri hasrat kalam karti hai

hami wo ilm ke raushan charagh hain jin ko

hawa bujhati nahin hai salam karti hai

kisi bhi taur sikhati nahin hai aazadi

mere huzur mohabbat ghulam karti hai

ye sar-ba-sajda kaha nek-dil tawaif ne

KHudaya shukr ki beTi bhi kaam karti hai

fana ki jhil mein jis tarah waqt rahta hai

kuchh is tarah se wo mujh mein qiyam karti hai

charagh-e-muflis-o-bebas ka haal ho jaise

hamare sath kuchh aisa hi sham karti hai

hawa-o-hirs ki lanat ka kya karen 'KHalid'

teri talab ko saliqe se ram karti hai