log yak-rangi-e-wahshat se bhi uktae hain

log yak-rangī-e-vahshat se bhī uktā.e haiñ

ham bayābāñ se yahī ek ḳhabar laa.e haiñ

pyaas buniyād hai jiine kī bujhā leñ kaise

ham ne ye ḳhvāb na dekhe haiñ na dikhlā.e haiñ

ham thake-hāre haiñ ai azm-e-safar ham ko sañbhāl

kahīñ saaya jo nazar aayā hai ghabrā.e haiñ

zindagī DhūñDh le tū bhī kisī dīvāne ko

us ke gesū to mire pyaar ne suljhā.e haiñ

yaad jis chiiz ko kahte haiñ vo parchhā.īñ hai

aur saa.e bhī kisī shaḳhs ke haath aa.e haiñ

haañ unhīñ logoñ se duniyā meñ shikāyat hai hameñ

haañ vahī log jo aksar hameñ yaad aa.e haiñ

is bayābān-e-dar-o-bām meñ kyā rakkhā hai

ham hī dīvāne haiñ sahrā se chale aa.e haiñ

log yak-rangi-e-wahshat se bhi uktae hain

hum bayaban se yahi ek KHabar lae hain

pyas buniyaad hai jine ki bujha len kaise

hum ne ye KHwab na dekhe hain na dikhlae hain

hum thake-haare hain ai azm-e-safar hum ko sanbhaal

kahin saya jo nazar aaya hai ghabrae hain

zindagi DhunDh le tu bhi kisi diwane ko

us ke gesu to mere pyar ne suljhae hain

yaad jis chiz ko kahte hain wo parchhain hai

aur sae bhi kisi shaKHs ke hath aae hain

han unhin logon se duniya mein shikayat hai hamein

han wahi log jo aksar hamein yaad aae hain

is bayaban-e-dar-o-baam mein kya rakkha hai

hum hi diwane hain sahra se chale aae hain