mamura-e-afkar mein ek hashr bapa hai

ma.amūra-e-afkār meñ ik hashr bapā hai

idrāk bhī insāñ ke liye turfa balā hai

har naqsh agar terā hī naqsh-e-kaf-e-pā hai

phir mere liye koī sazā hai na jazā hai

hoñToñ pe hañsī sīnoñ meñ kohrām bapā hai

dīvānoñ ne jiine kā chalan siikh liyā hai

ab dasht-e-junūñ bhī jo simaT aa.e ajab kyā

dīvāna koī le ke tirā naam chalā hai

ik baar jo TuuTe to kabhī juḌ nahīñ saktā

ā.īna nahīñ dil magar ā.īna-numā hai

apnoñ se kabhī maut judā kar nahīñ saktī

jo TuuT gayā haath vo siine pe dharā hai

ham zauq-e-samā.at se haiñ mahrūm vagarna

har qatra-e-shabnam meñ dhaḌakne kī sadā hai

vo sāmne aa.e haiñ kuchh is turfa adā se

ādāb mohabbat ke bhī dil bhuul gayā hai

dhaḌkā ye lagā hai ki sahar aa.e na aa.e

is ġham se sar-e-shām hī dil Duub rahā hai

mamura-e-afkar mein ek hashr bapa hai

idrak bhi insan ke liye turfa bala hai

har naqsh agar tera hi naqsh-e-kaf-e-pa hai

phir mere liye koi saza hai na jaza hai

honTon pe hansi sinon mein kohram bapa hai

diwanon ne jine ka chalan sikh liya hai

ab dasht-e-junun bhi jo simaT aae ajab kya

diwana koi le ke tera nam chala hai

ek bar jo TuTe to kabhi juD nahin sakta

aaina nahin dil magar aaina-numa hai

apnon se kabhi maut juda kar nahin sakti

jo TuT gaya hath wo sine pe dhara hai

hum zauq-e-samaat se hain mahrum wagarna

har qatra-e-shabnam mein dhaDakne ki sada hai

wo samne aae hain kuchh is turfa ada se

aadab mohabbat ke bhi dil bhul gaya hai

dhaDka ye laga hai ki sahar aae na aae

is gham se sar-e-sham hi dil Dub raha hai