mahmil hai matlub na laila mangta hai

mahmil hai matlūb na lailā māñgtā hai

chāk-girebāñ qais to sahrā māñgtā hai

hijr sar-e-vīrāna-e-jāñ bhī mohr-ba-lab

vasl galī-kūchoñ meñ charchā māñgtā hai

is ā.īna-ḳhāne kā har raqs-kunāñ

apne sāmne apnā tamāshā māñgtā hai

nā-ummīdī laakh qafas ījād kare

tā.ir-e-dil parvāz-e-tamannā māñgtā hai

umr bitātā hai imroz meñ aur makīñ

darvāze par dastak-e-fardā māñgtā hai

dhuup javānī kā yārāna apnī jagah

thak jaatā hai jism to saaya māñgtā hai

bāñdh sag-e-āvāra chaukhaT ke andar

ek musāfir tujh se rastā māñgtā hai

log tavālat se ghabrāte haiñ varna

ek zamāna sīdhā rastā māñgtā hai

mahmil hai matlub na laila mangta hai

chaak-gireban qais to sahra mangta hai

hijr sar-e-virana-e-jaan bhi mohr-ba-lab

wasl gali-kuchon mein charcha mangta hai

is aaina-KHane ka har raqs-kunan

apne samne apna tamasha mangta hai

na-ummidi lakh qafas ijad kare

tair-e-dil parwaz-e-tamanna mangta hai

umr bitata hai imroz mein aur makin

darwaze par dastak-e-farda mangta hai

dhup jawani ka yarana apni jagah

thak jata hai jism to saya mangta hai

bandh sag-e-awara chaukhaT ke andar

ek musafir tujh se rasta mangta hai

log tawalat se ghabraate hain warna

ek zamana sidha rasta mangta hai