main ek sham jo lauTa ghubar-e-jaan ban kar

maiñ ek shaam jo lauTā ġhubār-e-jāñ ban kar

bikhar ke rah gayā rāhoñ kī dāstāñ ban kar

maiñ ḳhud meñ gūñjtā huuñ ban ke terā sannāTā

mujhe na dekh mirī tarah be-zabāñ ban kar

maiñ apne aap kā vo shor thā tujhe pā kar

tujhe Darā diyā āvāz-e-be-amāñ ban kar

har ek shaḳhs hai afvāh aap hī apnī

har ik ko jāntā hai har koī gumāñ ban kar

tamām samteñ palaTtī sī jaan paḌtī haiñ

pahuñch rahā huuñ kahāñ dard-e-lā-makāñ ban kar

ye kis ko DhūñD rahā huuñ maiñ ek arse se

ḳhud apnā hī koī bhaTkā huā nishāñ ban kar

jo ḳhud the apnī sadā kā yaqīñ vahī to haiñ ham

pahāḌ jaise koī uḌ gayā dhuāñ ban kar

tū kar ke radd mujhe ḳhud ko zarā qubūl to kar

khaḌā huuñ tere liye ek imtihāñ ban kar

ḳhud apnī baat kā dukh ban ke rah na jā ai 'talḳh'

har ek dil meñ samā jā ġham-e-jahāñ ban kar

main ek sham jo lauTa ghubar-e-jaan ban kar

bikhar ke rah gaya rahon ki dastan ban kar

main KHud mein gunjta hun ban ke tera sannaTa

mujhe na dekh meri tarah be-zaban ban kar

main apne aap ka wo shor tha tujhe pa kar

tujhe Dara diya aawaz-e-be-aman ban kar

har ek shaKHs hai afwah aap hi apni

har ek ko jaanta hai har koi guman ban kar

tamam samten palaTti si jaan paDti hain

pahunch raha hun kahan dard-e-la-makan ban kar

ye kis ko DhunD raha hun main ek arse se

KHud apna hi koi bhaTka hua nishan ban kar

jo KHud the apni sada ka yaqin wahi to hain hum

pahaD jaise koi uD gaya dhuan ban kar

tu kar ke radd mujhe KHud ko zara qubul to kar

khaDa hun tere liye ek imtihan ban kar

KHud apni baat ka dukh ban ke rah na ja ai 'talKH'

har ek dil mein sama ja gham-e-jahan ban kar