main shaKH se uDa tha sitaron ki aas mein

maiñ shāḳh se uḌā thā sitāroñ kī aas meñ

murjhā ke aa girā huuñ magar sard ghaas meñ

socho to silvaToñ se bharī hai tamām ruuh

dekho to ik shikan bhī nahīñ hai libās meñ

sahrā kī būd-o-bāsh hai achchhī na kyuuñ lage

sūkhī huī gulāb kī Tahnī gilās meñ

chamke nahīñ nazar meñ abhī naqsh duur ke

masrūf huuñ abhī amal-e-in.ikās meñ

dhoke se us hasīñ ko agar chuum bhī liyā

pāoge dil kā zahr laboñ kī miThās meñ

taara koī ridā-e-shab-e-abr meñ na thā

baiThā thā maiñ udaas bayābān-e-yās meñ

jū-e-ravān-e-dasht abhī sūkhnā nahīñ

sāvan hai duur aur vahī shiddat hai pyaas meñ

rahtā thā sāmne tirā chehra khulā huā

paḌhtā thā maiñ kitāb yahī har class meñ

kāñToñ kī baaḌ phāñd gayā thā magar 'shakeb'

rasta na mil sakā mujhe phūloñ kī baas meñ

main shaKH se uDa tha sitaron ki aas mein

murjha ke aa gira hun magar sard ghas mein

socho to silwaTon se bhari hai tamam ruh

dekho to ek shikan bhi nahin hai libas mein

sahra ki bud-o-bash hai achchhi na kyun lage

sukhi hui gulab ki Tahni gilas mein

chamke nahin nazar mein abhi naqsh dur ke

masruf hun abhi amal-e-inikas mein

dhoke se us hasin ko agar chum bhi liya

paoge dil ka zahr labon ki miThas mein

tara koi rida-e-shab-e-abr mein na tha

baiTha tha main udas bayaban-e-yas mein

ju-e-rawan-e-dasht abhi sukhna nahin

sawan hai dur aur wahi shiddat hai pyas mein

rahta tha samne tera chehra khula hua

paDhta tha main kitab yahi har class mein

kanTon ki baD phand gaya tha magar 'shakeb'

rasta na mil saka mujhe phulon ki bas mein