main tujhe bhulna chahun bhi to na-mumkin hai

maiñ tujhe bhūlnā chāhūñ bhī to nā-mumkin hai

tū mirī pahlī mohabbat hai mirā mohsin hai

maiñ use sub.h na jānūñ jo tire sañg nahīñ

maiñ use shaam na mānūñ ki jo tere bin hai

kaisā manzar hai tire hijr ke pas-e-manzar kā

reg-e-sahrā hai ravāñ aur havā sākin hai

terī āñkhoñ se tire hāthoñ se lagtā to nahīñ

mere ahbāb ye kahte haiñ ki to kamsin hai

abhī kuchh der meñ ho jā.egā āñgan jal-thal

abhī āġhāz hai bārish kā abhī kin-min hai

ain mumkin hai ki kal vaqt faqat merā ho

aaj muTThī meñ ye aayā huā pahlā din hai

aaj kā din to bahut ḳhair se guzrā 'nāsik'

kal kī kyuuñ fikr karūñ kal kā ḳhudā zāmin hai

main tujhe bhulna chahun bhi to na-mumkin hai

tu meri pahli mohabbat hai mera mohsin hai

main use subh na jaanun jo tere sang nahin

main use sham na manun ki jo tere bin hai

kaisa manzar hai tere hijr ke pas-e-manzar ka

reg-e-sahra hai rawan aur hawa sakin hai

teri aankhon se tere hathon se lagta to nahin

mere ahbab ye kahte hain ki to kamsin hai

abhi kuchh der mein ho jaega aangan jal-thal

abhi aaghaz hai barish ka abhi kin-min hai

ain mumkin hai ki kal waqt faqat mera ho

aaj muTThi mein ye aaya hua pahla din hai

aaj ka din to bahut KHair se guzra 'nasik'

kal ki kyun fikr karun kal ka KHuda zamin hai