manzil-e-dil mili kahan KHatm-e-safar ke baad bhi

manzil-e-dil milī kahāñ ḳhatm-e-safar ke baad bhī

rahguzar ek aur thī rāhguzar ke baad bhī

aaj tire savāl par phir mire lab ḳhamosh haiñ

aisī hī kashmakash thī kuchh pahlī nazar ke baad bhī

dil meñ the laakh vasvase jalva-e-āftāb tak

rah ga.ī thī jo tīrgī nūr-e-sahar ke baad bhī

nāseh-e-maslahat-navāz tujh ko batā.ūñ kyā ye raaz

hausla-e-nigāh hai ḳhūn-e-jigar ke baad bhī

haar ke bhī nahīñ miTī dil se ḳhalish hayāt kī

kitne nizām miT ga.e jashn-e-zafar ke baad bhī

koī mirā hī āshiyāñ hāsil-e-fasl-e-gul na thā

haañ ye bahār hai bahār raqs-e-sharar ke baad bhī

ek tumhārī yaad ne laakh diye jalā.e haiñ

āmad-e-shab ke qabl bhī ḳhatm-e-sahar ke baad bhī

manzil-e-dil mili kahan KHatm-e-safar ke baad bhi

rahguzar ek aur thi rahguzar ke baad bhi

aaj tere sawal par phir mere lab KHamosh hain

aisi hi kashmakash thi kuchh pahli nazar ke baad bhi

dil mein the lakh waswase jalwa-e-aftab tak

rah gai thi jo tirgi nur-e-sahar ke baad bhi

naseh-e-maslahat-nawaz tujh ko bataun kya ye raaz

hausla-e-nigah hai KHun-e-jigar ke baad bhi

haar ke bhi nahin miTi dil se KHalish hayat ki

kitne nizam miT gae jashn-e-zafar ke baad bhi

koi mera hi aashiyan hasil-e-fasl-e-gul na tha

han ye bahaar hai bahaar raqs-e-sharar ke baad bhi

ek tumhaari yaad ne lakh diye jalae hain

aamad-e-shab ke qabl bhi KHatm-e-sahar ke baad bhi