mehr o mahtab ko mere hi nishan jaanti hai

mehr o mahtāb ko mere hī nishāñ jāntī hai

maiñ kahāñ huuñ vo marī sarv-e-ravāñ jāntī hai

tum se ho kar hī to aa.ī hai lahū tak mere

tum ko ye surḳhī-e-jāñ shola-ruḳhāñ jāntī hai

kaun apnā hai samajhtī hai ḳhamoshī shab kī

ajnabī kaun hai āvāz-e-sagāñ jāntī hai

dil ko ma.alūm hai kyā baat batānī hai use

us se kyā baat chhupānī hai zabāñ jāntī hai

ḳhaak ko chhoḌ ke jaanā hameñ manzūr nahīñ

ham ḳhas-o-ḳhār nahīñ jū-e-tapāñ jāntī hai

tū kabhī ḳhvāhish-e-duniyā nahīñ karne vaalā

mere abdāl tujhe dānish-e-jāñ jāntī hai

mere paas aa ke bhī rahtī hai gurezāñ mujh se

maiñ na Dūbūñgā mirī mauj-e-gumāñ jāntī hai

is tarah ghūrtī rahtī hai shab-o-roz mujhe

jaise duniyā mire sab rāz-e-nihāñ jāntī hai

mehr o mahtab ko mere hi nishan jaanti hai

main kahan hun wo mari sarw-e-rawan jaanti hai

tum se ho kar hi to aai hai lahu tak mere

tum ko ye surKHi-e-jaan shola-ruKHan jaanti hai

kaun apna hai samajhti hai KHamoshi shab ki

ajnabi kaun hai aawaz-e-sagan jaanti hai

dil ko malum hai kya baat batani hai use

us se kya baat chhupani hai zaban jaanti hai

KHak ko chhoD ke jaana hamein manzur nahin

hum KHas-o-KHar nahin ju-e-tapan jaanti hai

tu kabhi KHwahish-e-duniya nahin karne wala

mere abdal tujhe danish-e-jaan jaanti hai

mere pas aa ke bhi rahti hai gurezan mujh se

main na Dubunga meri mauj-e-guman jaanti hai

is tarah ghurti rahti hai shab-o-roz mujhe

jaise duniya mere sab raaz-e-nihan jaanti hai