mera shikwa teri mahfil mein adu karte hain

merā shikva tirī mahfil meñ adū karte haiñ

us pe bhī sabr ham ai arbada-jū karte haiñ

mashq-e-bedād-o-sitam karte haiñ gar vo to yahāñ

ham bhī bedād o sitam sahne kī ḳhū karte haiñ

jaañ huī hai nigah-e-nām pe un kī āshiq

chaak dil tār-e-nazar se jo rafū karte haiñ

be-sabātī chaman-e-dahr kī hai jin pe khulī

havas-e-rañg na vo ḳhvāhish-e-bū karte haiñ

aaj shamshīr ba-kaf nikle haiñ vo dekhiye tar

āb-e-shamshīr se kis kis ke gulū karte haiñ

hai rachī jin ke dimāġhoñ meñ tirī zulf kī bū

ambar o mushk kī kab bū ko vo bū karte haiñ

mushk o ambar kā unheñ naam bhī lenā hai nañg

yaar kī zulf-e-mo.ambar ko jo bū karte haiñ

chaak karte haiñ garebāñ ko vahshat meñ kabhī

chāk-e-dil meñ kabhū nāḳhun ko farū karte haiñ

dekh saudā-zada-e-ulfat-e-ḳhūbāñ ai 'aish'

vādi-e-ishq meñ kyā kyā tag-o-pū karte haiñ

mera shikwa teri mahfil mein adu karte hain

us pe bhi sabr hum ai arbada-ju karte hain

mashq-e-bedad-o-sitam karte hain gar wo to yahan

hum bhi bedad o sitam sahne ki KHu karte hain

jaan hui hai nigah-e-nam pe un ki aashiq

chaak dil tar-e-nazar se jo rafu karte hain

be-sabaati chaman-e-dahr ki hai jin pe khuli

hawas-e-rang na wo KHwahish-e-bu karte hain

aaj shamshir ba-kaf nikle hain wo dekhiye tar

aab-e-shamshir se kis kis ke gulu karte hain

hai rachi jin ke dimaghon mein teri zulf ki bu

ambar o mushk ki kab bu ko wo bu karte hain

mushk o ambar ka unhen nam bhi lena hai nang

yar ki zulf-e-moambar ko jo bu karte hain

chaak karte hain gareban ko wahshat mein kabhi

chaak-e-dil mein kabhu naKHun ko faru karte hain

dekh sauda-zada-e-ulfat-e-KHuban ai 'aish'

wadi-e-ishq mein kya kya tag-o-pu karte hain