mera zamir bahut hai mujhe saza ke liye

mirā zamīr bahut hai mujhe sazā ke liye

tū dost hai to nasīhat na kar ḳhudā ke liye

vo kashtiyāñ mirī patvār jin ke TuuT ga.e

vo bādbāñ jo taraste rahe havā ke liye

bas ek huuk sī dil se uThe ghaTā kī tarah

ki harf o saut zarūrī nahīñ duā ke liye

jahāñ meñ rah ke jahāñ se barābarī kī ye choT

ik imtihān-e-musalsal mirī anā ke liye

namīda-ḳhū hai ye miTTī har ek mausam meñ

zamīn-e-dil hai tarastī nahīñ ghaTā ke liye

maiñ terā dost huuñ tū mujh se is tarah to na mil

barat ye rasm kisī sūrat-āshnā ke liye

milūñgā ḳhaak meñ ik roz biij ke mānind

fanā pukār rahī hai mujhe baqā ke liye

mah o sitāra o ḳhurshīd o charḳh haf-iqlīm

ye ehtimām mire dast-e-nā-rasā ke liye

jafā jafā hī agar hai to rañj kyā ho 'shāz'

vafā kī pusht-panāhī bhī ho jafā ke liye

mera zamir bahut hai mujhe saza ke liye

tu dost hai to nasihat na kar KHuda ke liye

wo kashtiyan meri patwar jin ke TuT gae

wo baadban jo taraste rahe hawa ke liye

bas ek huk si dil se uThe ghaTa ki tarah

ki harf o saut zaruri nahin dua ke liye

jahan mein rah ke jahan se barabari ki ye choT

ek imtihan-e-musalsal meri ana ke liye

namida-KHu hai ye miTTi har ek mausam mein

zamin-e-dil hai tarasti nahin ghaTa ke liye

main tera dost hun tu mujh se is tarah to na mil

barat ye rasm kisi surat-ashna ke liye

milunga KHak mein ek roz bij ke manind

fana pukar rahi hai mujhe baqa ke liye

mah o sitara o KHurshid o charKH haf-iqlim

ye ehtimam mere dast-e-na-rasa ke liye

jafa jafa hi agar hai to ranj kya ho 'shaz'

wafa ki pusht-panahi bhi ho jafa ke liye