مزاج پوچھتے رہتے ہو مجھ سے کیوں میرا

مزاج پوچھتے رہتے ہو مجھ سے کیوں میرا

کہ جب سمجھ نہ سکے جذب اندرون میرا

وہ دیکھ نوک سناں کی بلندیوں کی طرف

سپاہ ظلم نہ کر پائی سر نگوں میرا

یہ احتجاج عجب ہے خلاف تیغ ستم

زمیں میں جذب نہیں ہو رہا ہے خوں میرا

ابھی درخت کے سائے میں تھک کے بیٹھا ہے

ہزار رات کا جاگا ہوا جنوں میرا

میں لفظ وصل کے مفہوم تک کو بھول گیا

کسی نے چھین لیا اس طرح سکوں میرا

عجب نہیں ہے کہ تنہائی شعر پڑھتی ہے

سیاہ رات پہ چلتا ہے جب فسوں میرا

بس ایک حرف محبت کا ربط ہے تجھ سے

وگرنہ کچھ نہیں لگتا ہے تو بھی یوں میرا