munqalib surat-e-haalat bhi ho jati hai

munqalib sūrat-e-hālāt bhī ho jaatī hai

din bhale hoñ to karāmāt bhī ho jaatī hai

husn ko aatā hai jab apnī zarūrat kā ḳhayāl

ishq par lutf kī barsāt bhī ho jaatī hai

dair o ka.aba hī is kā na ta.alluq samjho

zindagī hai ye ḳharābāt bhī ho jaatī hai

jabr se tā.at-e-yazdāñ bhī hai bār-e-ḳhātir

pyaar se ādat-e-ḳhidmāt bhī ho jaatī hai

dāvar-e-hashr mujhe apnā musāhib na samajh

ba.az auqāt kharī baat bhī ho jaatī hai

hashr meñ le ke chalo mutrib o ma.ashūq o subū

ġhair ke ghar meñ kabhī raat bhī ho jaatī hai

ba.az auqāt kisī aur ke milne se 'adam'

apnī hastī se mulāqāt bhī ho jaatī hai

munqalib surat-e-haalat bhi ho jati hai

din bhale hon to karamat bhi ho jati hai

husn ko aata hai jab apni zarurat ka KHayal

ishq par lutf ki barsat bhi ho jati hai

dair o kaba hi is ka na talluq samjho

zindagi hai ye KHarabaat bhi ho jati hai

jabr se taat-e-yazdan bhi hai bar-e-KHatir

pyar se aadat-e-KHidmat bhi ho jati hai

dawar-e-hashr mujhe apna musahib na samajh

baz auqat khari baat bhi ho jati hai

hashr mein le ke chalo mutrib o mashuq o subu

ghair ke ghar mein kabhi raat bhi ho jati hai

baz auqat kisi aur ke milne se 'adam'

apni hasti se mulaqat bhi ho jati hai