panw mara tha pahaDon pe to pani nikla

paañv maarā thā pahāḌoñ pe to paanī niklā

ye vahī jism kā aahan hai ki miTTī niklā

mere ham-rāh vahī tohmat-e-āzādī hai

merā har ahd vahī ahd-e-asīrī niklā

ek chehra thā ki ab yaad nahīñ aatā hai

ek lamha thā vahī jaan kā bairī niklā

ek maat aisī hai jo saath chalī aatī hai

varna har chaal se jiite hue baazī niklā

mauj kī tarah bahā dard ke dariyāoñ meñ

is tarah zinda bachā kaun magar jī niklā

maiñ ajab dekhne vaalā huuñ ki andhā kahlā.ūñ

vo ajab ḳhaak kā putlā thā ki nuurī niklā

jaan pyārī thī magar jaan se be-zārī thī

jaan kā kaam faqat jān-faroshī niklā

ḳhaak maiñ us kī judā.ī meñ pareshān phirūñ

jab ki ye milnā bichhaḌnā mirī marzī niklā

sirf ronā hai ki jiinā paḌā halkā ban ke

vo to ehsās kī mīzān pe bhārī niklā

ik na.e naam se phir apne sitāre uljhe

ye nayā khel na.e ḳhvāb kā baanī niklā

vo mirī ruuh kī uljhan kā sabab jāntā hai

jism kī pyaas bujhāne pe bhī raazī niklā

merī bujhtī huī āñkhoñ se kiran chuntā hai

merī āñkhoñ kā khañDar shahr-e-ma.ānī niklā

merī ayyār nigāhoñ se vafā māñgtā hai

vo bhī mohtāj milā vo bhī savālī niklā

maiñ use DhūñD rahā thā ki talāsh apnī thī

ik chamaktā huā jazba thā ki ja.alī niklā

maiñ ne chāhā thā ki ashkoñ kā tamāshā dekhūñ

aur āñkhoñ kā ḳhazāna thā ki ḳhālī niklā

ik na.ī dhuup meñ phir apnā safar jaarī hai

vo ghanā saaya faqat tifl-e-tasallī niklā

maiñ bahut tez chalā apnī tabāhī kī taraf

us ke chhuTne kā sabab narm-ḳhirāmī niklā

ruuh kā dasht vahī jism kā vīrāna hai

har nayā raaz purānā lagā baasī niklā

sirf hashmat kī talab jaah kī ḳhvāhish paa.ī

dil ko be-dāġh samajhtā thā jazāmī niklā

ik balā aatī hai aur log chale jaate haiñ

ik sadā kahtī hai har aadmī faanī niklā

maiñ vo murda huuñ ki āñkheñ mirī zindoñ jaisī

bain kartā huuñ ki maiñ apnā hī saanī niklā

panw mara tha pahaDon pe to pani nikla

ye wahi jism ka aahan hai ki miTTi nikla

mere ham-rah wahi tohmat-e-azadi hai

mera har ahd wahi ahd-e-asiri nikla

ek chehra tha ki ab yaad nahin aata hai

ek lamha tha wahi jaan ka bairi nikla

ek mat aisi hai jo sath chali aati hai

warna har chaal se jite hue bazi nikla

mauj ki tarah baha dard ke dariyaon mein

is tarah zinda bacha kaun magar ji nikla

main ajab dekhne wala hun ki andha kahlaun

wo ajab KHak ka putla tha ki nuri nikla

jaan pyari thi magar jaan se be-zari thi

jaan ka kaam faqat jaan-faroshi nikla

KHak main us ki judai mein pareshan phirun

jab ki ye milna bichhaDna meri marzi nikla

sirf rona hai ki jina paDa halka ban ke

wo to ehsas ki mizan pe bhaari nikla

ek nae nam se phir apne sitare uljhe

ye naya khel nae KHwab ka bani nikla

wo meri ruh ki uljhan ka sabab jaanta hai

jism ki pyas bujhane pe bhi raazi nikla

meri bujhti hui aankhon se kiran chunta hai

meri aankhon ka khanDar shahr-e-maani nikla

meri ayyar nigahon se wafa mangta hai

wo bhi mohtaj mila wo bhi sawali nikla

main use DhunD raha tha ki talash apni thi

ek chamakta hua jazba tha ki jali nikla

main ne chaha tha ki ashkon ka tamasha dekhun

aur aankhon ka KHazana tha ki KHali nikla

ek nai dhup mein phir apna safar jari hai

wo ghana saya faqat tifl-e-tasalli nikla

main bahut tez chala apni tabahi ki taraf

us ke chhuTne ka sabab narm-KHirami nikla

ruh ka dasht wahi jism ka virana hai

har naya raaz purana laga basi nikla

sirf hashmat ki talab jah ki KHwahish pai

dil ko be-dagh samajhta tha jazami nikla

ek bala aati hai aur log chale jate hain

ek sada kahti hai har aadmi fani nikla

main wo murda hun ki aankhen meri zindon jaisi

bain karta hun ki main apna hi sani nikla