pairahan-e-rangin se shola sa nikalta hai

pairāhan-e-rañgīñ se sho'la sā nikaltā hai

mā'sūm hai kyā jaane dāman kahīñ jaltā hai

merī mizha-e-ġham par larzāñ hai haqīqat sī

un ke lab-e-la.alīñ par afsāna machaltā hai

achchhī hai rahe thoḌī ye jalva-tarāzī bhī

raqs-e-mah-o-anjum meñ dīvāna bahaltā hai

unvān-e-taraqqī hai ye tīra-fizā.ī bhī

kuchh gard bhī uThtī hai jab qāfila chaltā hai

hai shaam abhī kyā hai bahkī huī bāteñ haiñ

kuchh raat Dhale saaqī mai-ḳhāna sañbhaltā hai

bas dekh chukī duniyā ye bazm-farozī bhī

rakkhā hai charāġh aisā bujhtā hai na jaltā hai

ik sehr-e-shabistāñ hai ye fann-e-jahāñ-rānī

duniyā hai ki sotī hai jaadū hai ki chaltā hai

iflās ke aañsū se tūfāñ bhī larazte haiñ

sho'loñ kā jigar goyā shabnam se dahaltā hai

mutrib-ba-lab-e-la.alīñ sāqī-ba-mai-o-mīnā

is garmī-e-mahfil meñ īmān pighaltā hai

pairahan-e-rangin se sho'la sa nikalta hai

ma'sum hai kya jaane daman kahin jalta hai

meri mizha-e-gham par larzan hai haqiqat si

un ke lab-e-lalin par afsana machalta hai

achchhi hai rahe thoDi ye jalwa-taraazi bhi

raqs-e-mah-o-anjum mein diwana bahalta hai

unwan-e-taraqqi hai ye tira-fizai bhi

kuchh gard bhi uThti hai jab qafila chalta hai

hai sham abhi kya hai bahki hui baaten hain

kuchh raat Dhale saqi mai-KHana sanbhalta hai

bas dekh chuki duniya ye bazm-farozi bhi

rakkha hai charagh aisa bujhta hai na jalta hai

ek sehr-e-shabistan hai ye fann-e-jahan-rani

duniya hai ki soti hai jadu hai ki chalta hai

iflas ke aansu se tufan bhi larazte hain

sho'lon ka jigar goya shabnam se dahalta hai

mutrib-ba-lab-e-lalin saqi-ba-mai-o-mina

is garmi-e-mahfil mein iman pighalta hai