phul ne Tahni se uDne ki koshish ki

phuul ne Tahnī se uḌne kī koshish kī

ik taa.ir kā dil rakhne kī koshish kī

kal phir chāñd kā ḳhanjar ghoñp ke siine meñ

raat ne merī jaañ lene kī koshish kī

koī na koī rahbar rasta kaaT gayā

jab bhī apnī rah chalne kī koshish kī

kitnī lambī ḳhāmoshī se guzrā huuñ

un se kitnā kuchh kahne kī koshish kī

ek hī ḳhvāb ne saarī raat jagāyā hai

maiñ ne har karvaT sone kī koshish kī

ek sitāra jaldī jaldī Duub gayā

maiñ ne jab taare ginñe kī koshish kī

naam mirā thā aur pata apne ghar kā

us ne mujh ko ḳhat likhne kī koshish kī

ek dhueñ kā marġhola sā niklā hai

miTTī meñ jab dil bone kī koshish kī

phul ne Tahni se uDne ki koshish ki

ek tair ka dil rakhne ki koshish ki

kal phir chand ka KHanjar ghonp ke sine mein

raat ne meri jaan lene ki koshish ki

koi na koi rahbar rasta kaT gaya

jab bhi apni rah chalne ki koshish ki

kitni lambi KHamoshi se guzra hun

un se kitna kuchh kahne ki koshish ki

ek hi KHwab ne sari raat jagaya hai

main ne har karwaT sone ki koshish ki

ek sitara jaldi jaldi Dub gaya

main ne jab tare ginne ki koshish ki

nam mera tha aur pata apne ghar ka

us ne mujh ko KHat likhne ki koshish ki

ek dhuen ka marghola sa nikla hai

miTTi mein jab dil bone ki koshish ki