prem pujari dil ko mere tohfa ye anmol diya

prem pujārī dil ko mere tohfa ye anmol diyā

us ne chāhat ke pyāle meñ vish nafrat kā ghol diyā

kaisī qasmeñ kaise va.ade aur kaisā paimān-e-vafā

pyaar ko mere daulat kī mīzān pe us ne taul diyā

kab tak tanhā tanhā jiite kab tak dil ko samjhāte

jism se apne bāñdhā thā jo saañs kā bandhan khol diyā

is se achchhā thā bik jaate ham bhī sastī qīmat meñ

ham ne apnā fan duniyā ko be-bhāv be-mol diyā

aaheñ aañsū yaas kasak be-tābī-e-dil aur mahrūmī

mere dilbar ne mujh ko ye mere dil kā mol diyā

galiyoñ galiyoñ shahroñ shahroñ kis ne aag lagā.ī hai

buġhz-o-nafrat kā duniyā ko kis ne ye māhaul diyā

dil meñ ik halchal sī bapā hai nas nas meñ haijān 'salīm'

jaane kis ne kaan meñ aa ke ḳhushiyoñ kā ras ghol diyā

prem pujari dil ko mere tohfa ye anmol diya

us ne chahat ke pyale mein wish nafrat ka ghol diya

kaisi qasmen kaise wade aur kaisa paiman-e-wafa

pyar ko mere daulat ki mizan pe us ne taul diya

kab tak tanha tanha jite kab tak dil ko samjhate

jism se apne bandha tha jo sans ka bandhan khol diya

is se achchha tha bik jate hum bhi sasti qimat mein

hum ne apna fan duniya ko be-bhaw be-mol diya

aahen aansu yas kasak be-tabi-e-dil aur mahrumi

mere dilbar ne mujh ko ye mere dil ka mol diya

galiyon galiyon shahron shahron kis ne aag lagai hai

bughz-o-nafrat ka duniya ko kis ne ye mahaul diya

dil mein ek halchal si bapa hai nas nas mein haijaan 'salim'

jaane kis ne kan mein aa ke KHushiyon ka ras ghol diya