raigani hi raigani thi

rā.igānī hī rā.igānī thī

kyā kahānī mirī kahānī thī

ik to raajā ġhazab kā ziddī thā

phir vo raanī bhī qaisarānī thī

vo bhī terī dulhan ko pahnā dī

jo añgūThī tirī nishānī thī

kitne daav chalā.e duniyā ne

par vo laḌkī baḌī siyānī thī

ek chhoTā sā ghar nahīñ thā vo

shāh-zādī kī rājdhānī thī

vo jo dil meñ samā nahīñ paa.ī

ek til meñ kahāñ samānī thī

phir se ik yaad ke ta.āqub meñ

aañkh kal shaam paanī paanī thī

merā bantā thā jaan se jaanā

us kī āñkhoñ meñ bad-gumānī thī

daan kar dī zamīn-zādoñ ko

vo mohabbat jo āsmānī thī

chaa.e piinā to ik bahāna thā

aarzū dil kī tarjumānī thī

vo mohabbat kahāñ thī 'īmāñ' jī

ik musībat thī nā-gahānī thī

raigani hi raigani thi

kya kahani meri kahani thi

ek to raja ghazab ka ziddi tha

phir wo rani bhi qaisarani thi

wo bhi teri dulhan ko pahna di

jo anguThi teri nishani thi

kitne daw chalae duniya ne

par wo laDki baDi siyani thi

ek chhoTa sa ghar nahin tha wo

shah-zadi ki rajdhani thi

wo jo dil mein sama nahin pai

ek til mein kahan samani thi

phir se ek yaad ke taaqub mein

aankh kal sham pani pani thi

mera banta tha jaan se jaana

us ki aankhon mein bad-gumani thi

dan kar di zamin-zadon ko

wo mohabbat jo aasmani thi

chae pina to ek bahana tha

aarzu dil ki tarjumani thi

wo mohabbat kahan thi 'iman' ji

ek musibat thi na-gahani thi