rishton ke jab tar ulajhne lagte hain

rishtoñ ke jab taar ulajhne lagte haiñ

aapas meñ ghar-bār ulajhne lagte haiñ

maazī kī āñkhoñ meñ jhāñk ke dekhūñ to

kuchh chehre har baar ulajhne lagte haiñ

saal meñ ik aisā mausam bhī aatā hai

phūloñ se hī ḳhaar ulajhne lagte haiñ

ghar kī tanhā.ī meñ apne-āp se ham

ban kar ik dīvār ulajhne lagte haiñ

ye sab to duniyā meñ hotā rahtā hai

ham ḳhud se be-kār ulajhne lagte haiñ

kab tak apnā haal batā.eñ logoñ ko

tañg aa kar bīmār ulajhne lagte haiñ

jab dariyā kā koī chhor nahīñ miltā

kashtī se patvār ulajhne lagte haiñ

kuchh ḳhabroñ se itnī vahshat hotī hai

hāthoñ se aḳhbār ulajhne lagte haiñ

koī kahānī jab bojhal ho jaatī hai

nāTak ke kirdār ulajhne lagte haiñ

rishton ke jab tar ulajhne lagte hain

aapas mein ghar-bar ulajhne lagte hain

mazi ki aankhon mein jhank ke dekhun to

kuchh chehre har bar ulajhne lagte hain

sal mein ek aisa mausam bhi aata hai

phulon se hi KHar ulajhne lagte hain

ghar ki tanhai mein apne-ap se hum

ban kar ek diwar ulajhne lagte hain

ye sab to duniya mein hota rahta hai

hum KHud se be-kar ulajhne lagte hain

kab tak apna haal bataen logon ko

tang aa kar bimar ulajhne lagte hain

jab dariya ka koi chhor nahin milta

kashti se patwar ulajhne lagte hain

kuchh KHabron se itni wahshat hoti hai

hathon se aKHbar ulajhne lagte hain

koi kahani jab bojhal ho jati hai

naTak ke kirdar ulajhne lagte hain