roke se kahin hadsa-e-waqt ruka hai

roke se kahīñ hādsa-e-vaqt rukā hai

sho.aloñ se bachā shahr to shabnam se jalā hai

kamra kisī mānūs sī ḳhushbū se basā hai

jaise koī uTh kar abhī bistar se gayā hai

ye baat alag hai ki maiñ jiitā huuñ abhī tak

hone ko to sau baar mirā qatl huā hai

phūloñ ne churā lī haiñ mujhe dekh ke āñkheñ

kāñToñ ne baḌī duur se pahchān liyā hai

us samt abhī ḳhuun ke pyāse haiñ hazāroñ

is samt bas ik qatra-e-ḳhūñ aur bachā hai

rūdād-e-charāġhāñ to bahut ḳhuub hai lekin

kyā jāniye kis kis kā lahū in meñ jalā hai

is rañg-e-taġhazzul pe 'alī' chhāp hai merī

ye zauq-e-suḳhan mujh ko virāsat meñ milā hai

roke se kahin hadsa-e-waqt ruka hai

shoalon se bacha shahr to shabnam se jala hai

kamra kisi manus si KHushbu se basa hai

jaise koi uTh kar abhi bistar se gaya hai

ye baat alag hai ki main jita hun abhi tak

hone ko to sau bar mera qatl hua hai

phulon ne chura li hain mujhe dekh ke aankhen

kanTon ne baDi dur se pahchan liya hai

us samt abhi KHun ke pyase hain hazaron

is samt bas ek qatra-e-KHun aur bacha hai

rudad-e-charaghan to bahut KHub hai lekin

kya jaaniye kis kis ka lahu in mein jala hai

is rang-e-taghazzul pe 'ali' chhap hai meri

ye zauq-e-suKHan mujh ko wirasat mein mila hai