sar hi ab phoDiye nadamat mein

sar hī ab phoḌiye nadāmat meñ

niiñd aane lagī hai furqat meñ

haiñ dalīleñ tire ḳhilāf magar

sochtā huuñ tirī himāyat meñ

ruuh ne ishq kā fareb diyā

jism ko jism kī adāvat meñ

ab faqat ādatoñ kī varzish hai

ruuh shāmil nahīñ shikāyat meñ

ishq ko darmiyāñ na laao ki maiñ

chīḳhtā huuñ badan kī usrat meñ

ye kuchh āsān to nahīñ hai ki ham

rūThte ab bhī haiñ muravvat meñ

vo jo ta.amīr hone vaalī thī

lag ga.ī aag us imārat meñ

zindagī kis tarah basar hogī

dil nahīñ lag rahā mohabbat meñ

hāsil-e-kun hai ye jahān-e-ḳharāb

yahī mumkin thā itnī ujlat meñ

phir banāyā ḳhudā ne aadam ko

apnī sūrat pe aisī sūrat meñ

aur phir aadmī ne ġhaur kiyā

chhipkilī kī latīf san.at meñ

ai ḳhudā jo kahīñ nahīñ maujūd

kyā likhā hai hamārī qismat meñ

sar hi ab phoDiye nadamat mein

nind aane lagi hai furqat mein

hain dalilen tere KHilaf magar

sochta hun teri himayat mein

ruh ne ishq ka fareb diya

jism ko jism ki adawat mein

ab faqat aadaton ki warzish hai

ruh shamil nahin shikayat mein

ishq ko darmiyan na lao ki main

chiKHta hun badan ki usrat mein

ye kuchh aasan to nahin hai ki hum

ruThte ab bhi hain murawwat mein

wo jo tamir hone wali thi

lag gai aag us imarat mein

zindagi kis tarah basar hogi

dil nahin lag raha mohabbat mein

hasil-e-kun hai ye jahan-e-KHarab

yahi mumkin tha itni ujlat mein

phir banaya KHuda ne aadam ko

apni surat pe aisi surat mein

aur phir aadmi ne ghaur kiya

chhipkili ki latif sanat mein

ai KHuda jo kahin nahin maujud

kya likha hai hamari qismat mein