shaeri jhuT sahi ishq fasana hi sahi

shā.erī jhuuT sahī ishq fasāna hī sahī

zinda rahne ke liye koī bahāna hī sahī

ḳhaak kī lauh pe likkhā to gayā naam mirā

asl maqsūd tirā mujh ko miTānā hī sahī

ḳhvāb-e-uryāñ to isī tarah tar-o-tāza hai

haañ mirī niiñd kā malbūs purānā hī sahī

ek uḌte hue sayyāre ke pīchhe pīchhe

koī imkān koī shauq ravāna hī sahī

kyā kareñ aañkh agar us se sivā chāhtī hai

ye jahān-e-guzarāñ ā.ina-ḳhāna hī sahī

dil kā farmān sar-e-dast uThā rakhte haiñ

ḳhair kuchh roz ko takmīl-e-zamāna hī sahī

shaeri jhuT sahi ishq fasana hi sahi

zinda rahne ke liye koi bahana hi sahi

KHak ki lauh pe likkha to gaya nam mera

asl maqsud tera mujh ko miTana hi sahi

KHwab-e-uryan to isi tarah tar-o-taza hai

han meri nind ka malbus purana hi sahi

ek uDte hue sayyare ke pichhe pichhe

koi imkan koi shauq rawana hi sahi

kya karen aankh agar us se siwa chahti hai

ye jahan-e-guzaran aaina-KHana hi sahi

dil ka farman sar-e-dast uTha rakhte hain

KHair kuchh roz ko takmil-e-zamana hi sahi