sham se hum ta sahar chalte rahe

shaam se ham tā sahar chalte rahe

chuur the thak kar magar chalte rahe

sañg ho jaate jo muḌ kar dekhte

uñgliyāñ kānoñ meñ dhar chalte rahe

āsmāñ thā aag patthar thī zamīñ

thī kahāñ jā-e-mafar chalte rahe

roz Duube roz ubhre ham magar

sūrat-e-shams o qamar chalte rahe

sañg-bārī yuuñ to ham par bhī huī

ham Dhake hāthoñ se sar chalte rahe

dar badar kī ḳhaak thī taqdīr meñ

ham liye kāñdhoñ pe ghar chalte rahe

ham bhī haiñ 'bilqīs' majrūhīn meñ

ham pe bhī tiir o tabar chalte rahe

sham se hum ta sahar chalte rahe

chur the thak kar magar chalte rahe

sang ho jate jo muD kar dekhte

ungliyan kanon mein dhar chalte rahe

aasman tha aag patthar thi zamin

thi kahan ja-e-mafar chalte rahe

roz Dube roz ubhre hum magar

surat-e-shams o qamar chalte rahe

sang-bari yun to hum par bhi hui

hum Dhake hathon se sar chalte rahe

dar badar ki KHak thi taqdir mein

hum liye kandhon pe ghar chalte rahe

hum bhi hain 'bilqis' majruhin mein

hum pe bhi tir o tabar chalte rahe