shab ke pur-haul manazir se bacha le mujhko

shab ke pur-haul manāzir se bachā le mujh ko

maiñ tirī niiñd huuñ āñkhoñ meñ chhupā le mujh ko

maiñ tirī rāh-e-mashī.at kā huuñ zarra lekin

DhūñDhne vaalā sitāroñ meñ khañgāle mujh ko

ḳhauf āñkhoñ meñ mirī dekh ke chingārī kā

kar diyā raat ne sūraj ke havāle mujh ko

maiñ musavvir huuñ bure vaqt kī tasvīroñ kā

raas aate haiñ ye dīvār ke jaale mujh ko

'umr bhar jis ke liye peT se bāñdhe patthar

ab vo gin gin ke khilātā hai nivāle mujh ko

beḌiyāñ Daal ke parchhā.īñ kī pairoñ meñ mire

qaid rakhte haiñ añdheroñ meñ ujāle mujh ko

tere hāthoñ kā tarāshā huā patthar huuñ 'salīm'

ā.īna ho ga.e sab dekhne vaale mujh ko

shab ke pur-haul manazir se bacha le mujh ko

main teri nind hun aankhon mein chhupa le mujh ko

main teri rah-e-mashiat ka hun zarra lekin

DhunDhne wala sitaron mein khangale mujh ko

KHauf aankhon mein meri dekh ke chingari ka

kar diya raat ne suraj ke hawale mujh ko

main musawwir hun bure waqt ki taswiron ka

ras aate hain ye diwar ke jale mujh ko

'umr bhar jis ke liye peT se bandhe patthar

ab wo gin gin ke khilata hai niwale mujh ko

beDiyan Dal ke parchhain ki pairon mein mere

qaid rakhte hain andheron mein ujale mujh ko

tere hathon ka tarasha hua patthar hun 'salim'

aaina ho gae sab dekhne wale mujh ko