shiddat-e-zat ne ye haal banaya apna

shiddat-e-zāt ne ye haal banāyā apnā

jism-e-majnūñ meñ huā tañg shalokā apnā

yaar bantā nahīñ vo nuur kā putlā apnā

ḳhaak meñ mil gayā tasḳhīr kā da.avā apnā

mai-kashoñ meñ na koī mujh sā namāzī hogā

dar-e-mai-ḳhāna pe bichhtā hai musallā apnā

vasl kī raat bahut tuul huā āḳhir-kār

muḳhtasar ye hai ki faisal huā qissa apnā

gul khilā kar abhī bulbul ko jalā.ūñ kyā kyā

vo ināyat kareñ gar por kā chhallā apnā

rabbī-arenī kī sadā ho bhī to but bol uTheñ

aap dikhlā.eñ agar dair meñ jalva apnā

ā.īna-ḳhāna meñ chal baiThiye do-chār ghaḌī

dekhnā hove jo manzūr tamāshā apnā

jīte-jī ḳhvesh-o-aqārib the pas-e-marg afsos

ḳhaak meñ daab diyā koī na samjhā apnā

kisī sayyād kī paḌ jaa.e na chiḌiyā pe nazar

aap sarkā.eñ na mahram se dupaTTā apnā

aap sau baar ukhaḌ jaa.eñ nahīñ kuchh parvā

jam gayā ek parī-zād se naqsha apnā

dām-e-mahram meñ phañsāyā hai ḳhudā ḳhair kare

āshiyāna na banā baiThe ye chiḌiyā apnā

garm-ḳhvābī ne tirī zab.h kiyā ai qātil

ek dam bhī na kalejā huā ThanDā apnā

riñd-mashrab haiñ kisī se hameñ kuchh kaam nahīñ

dair apnā hai na ka.aba na kalīsā apnā

hai vahī sar vahī saudā vahī josh-e-vahshat

vasl tabdīl huī rañg na badlā apnā

un kī zulfoñ ko ye da.avā hai ki ham kaale haiñ

ham ne bachte nahīñ dekhā kabhī maarā apnā

ġhair se rakhiye na imdād kī ummīd 'āġhā'

kaam aatā hai mirī jaan bharosā apnā

shiddat-e-zat ne ye haal banaya apna

jism-e-majnun mein hua tang shaloka apna

yar banta nahin wo nur ka putla apna

KHak mein mil gaya tasKHir ka dawa apna

mai-kashon mein na koi mujh sa namazi hoga

dar-e-mai-KHana pe bichhta hai musalla apna

wasl ki raat bahut tul hua aaKHir-kar

muKHtasar ye hai ki faisal hua qissa apna

gul khila kar abhi bulbul ko jalaun kya kya

wo inayat karen gar por ka chhalla apna

rabbi-areni ki sada ho bhi to but bol uThen

aap dikhlaen agar dair mein jalwa apna

aaina-KHana mein chal baiThiye do-chaar ghaDi

dekhna howe jo manzur tamasha apna

jite-ji KHwesh-o-aqarib the pas-e-marg afsos

KHak mein dab diya koi na samjha apna

kisi sayyaad ki paD jae na chiDiya pe nazar

aap sarkaen na mahram se dupaTTa apna

aap sau bar ukhaD jaen nahin kuchh parwa

jam gaya ek pari-zad se naqsha apna

dam-e-mahram mein phansaya hai KHuda KHair kare

aashiyana na bana baiThe ye chiDiya apna

garm-KHwabi ne teri zabh kiya ai qatil

ek dam bhi na kaleja hua ThanDa apna

rind-mashrab hain kisi se hamein kuchh kaam nahin

dair apna hai na kaba na kalisa apna

hai wahi sar wahi sauda wahi josh-e-wahshat

wasl tabdil hui rang na badla apna

un ki zulfon ko ye dawa hai ki hum kale hain

hum ne bachte nahin dekha kabhi mara apna

ghair se rakhiye na imdad ki ummid 'agha'

kaam aata hai meri jaan bharosa apna