soz-e-gham-e-firaq se dil ko bachae kaun

soz-e-ġham-e-firāq se dil ko bachā.e kaun

zālim tirī lagā.ī huī ko bujhā.e kaun

miTTī marīz-e-ġham kī Thikāne lagā.e kaun

duniyā to un ke saath hai mayyat uThā.e kaun

tevar chaḌhā ke pūchh rahe haiñ vo hāl-e-dil

rūdād-e-ġham to yaad hai lekin sunā.e kaun

ham aaj kah rahe haiñ yahāñ dāstān-e-qais

kal dekhiye hamārā fasāna sunā.e kaun

ai nāḳhudā ḳhudā pe mujhe chhoḌ kar to dekh

sāhil pe kaun jā ke lage Duub jaa.e kaun

rusvā karegī dekh ke duniyā mujhe 'qamar'

is chāñdnī meñ un ko bulāne ko jaa.e kaun

soz-e-gham-e-firaq se dil ko bachae kaun

zalim teri lagai hui ko bujhae kaun

miTTi mariz-e-gham ki Thikane lagae kaun

duniya to un ke sath hai mayyat uThae kaun

tewar chaDha ke puchh rahe hain wo haal-e-dil

rudad-e-gham to yaad hai lekin sunae kaun

hum aaj kah rahe hain yahan dastan-e-qais

kal dekhiye hamara fasana sunae kaun

ai naKHuda KHuda pe mujhe chhoD kar to dekh

sahil pe kaun ja ke lage Dub jae kaun

ruswa karegi dekh ke duniya mujhe 'qamar'

is chandni mein un ko bulane ko jae kaun