subh-e-ummid ki ek sham jalai gai thi

sub.h-e-ummīd kī ik sham' jalā.ī ga.ī thī

is tarah mamlikat-e-jism bachā.ī ga.ī thī

kitnā be-faiz zamāna thā ki ḳhvāhish merī

gosha-e-dil meñ taḌaptī huī paa.ī ga.ī thī

muddatoñ tujh pe luTātā rahā maiñ daulat-e-dil

jo kisī aur ke hisse kī kamā.ī ga.ī thī

dekhne vāloñ kī āñkhoñ meñ utar aatī thī

ek tasvīr jo kāġhaz pe banā.ī ga.ī thī

mere māthe pe ubhar aate the vahshat ke nuqūsh

merī miTTī kisī sahrā se uThā.ī ga.ī thī

mujh se mat pūchh shab-e-shahar-e-junūñ kā qissa

ḳhvāb aate nahīñ the niiñd uḌaa.ī ga.ī thī

chashm-e-hairat ne vo duniyā bhī to dekhī hai jahāñ

pyaas dariyāoñ kī sahrā se bujhā.ī ga.ī thī

subh-e-ummid ki ek sham' jalai gai thi

is tarah mamlikat-e-jism bachai gai thi

kitna be-faiz zamana tha ki KHwahish meri

gosha-e-dil mein taDapti hui pai gai thi

muddaton tujh pe luTata raha main daulat-e-dil

jo kisi aur ke hisse ki kamai gai thi

dekhne walon ki aankhon mein utar aati thi

ek taswir jo kaghaz pe banai gai thi

mere mathe pe ubhar aate the wahshat ke nuqush

meri miTTi kisi sahra se uThai gai thi

mujh se mat puchh shab-e-shahar-e-junun ka qissa

KHwab aate nahin the nind uDai gai thi

chashm-e-hairat ne wo duniya bhi to dekhi hai jahan

pyas dariyaon ki sahra se bujhai gai thi