sukut-e-sham ka hissa tu mat bana mujhko

sukūt-e-shām kā hissa tū mat banā mujh ko

maiñ rang huuñ so kisī mauj meñ milā mujh ko

maiñ in dinoñ tirī āñkhoñ ke iḳhtiyār meñ huuñ

jamāl-e-sabz kisī tajrabe meñ lā mujh ko

maiñ būḌhe jism kī zillat uThā nahīñ saktā

kisī qadīm tajallī se kar nayā mujh ko

maiñ apne hone kī takmīl chāhtā huuñ sakhī

so ab badan kī hirāsat se kar rihā mujh ko

mujhe charāġh kī hairat bhī ho chukī mā'lūm

ab is se aage koī rāsta batā mujh ko

us ism-e-ḳhās kī tarkīb se banā huuñ maiñ

mohabbatoñ ke talaffuz se kar nayā mujh ko

darūn-e-sīna jise dil samajh rahā thā 'alī'

vo niilī aag hai ye ab patā chalā mujh ko

sukut-e-sham ka hissa tu mat bana mujh ko

main rang hun so kisi mauj mein mila mujh ko

main in dinon teri aankhon ke iKHtiyar mein hun

jamal-e-sabz kisi tajrabe mein la mujh ko

main buDhe jism ki zillat uTha nahin sakta

kisi qadim tajalli se kar naya mujh ko

main apne hone ki takmil chahta hun sakhi

so ab badan ki hirasat se kar riha mujh ko

mujhe charagh ki hairat bhi ho chuki ma'lum

ab is se aage koi rasta bata mujh ko

us ism-e-KHas ki tarkib se bana hun main

mohabbaton ke talaffuz se kar naya mujh ko

darun-e-sina jise dil samajh raha tha 'ali'

wo nili aag hai ye ab pata chala mujh ko