ta-ba maqdur intizar kiya

tā-ba maqdūr intizār kiyā

dil ne ab zor be-qarār kiyā

dushmanī ham se kī zamāne ne

ki jafākār tujh sā yaar kiyā

ye tavahhum kā kārḳhāna hai

yaañ vahī hai jo e'tibār kiyā

ek nāvak ne us kī mizhgāñ ke

tā.er-e-sidra tak shikār kiyā

sad-rag-e-jāñ ko taab de bāham

terī zulfoñ kā ek taar kiyā

ham faqīroñ se be-adā.ī kyā

aan baiThe jo tum ne pyaar kiyā

saḳht kāfir thā jin ne pahle 'mīr'

maz.hab-e-ishq iḳhtiyār kiyā

ta-ba maqdur intizar kiya

dil ne ab zor be-qarar kiya

dushmani hum se ki zamane ne

ki jafakar tujh sa yar kiya

ye tawahhum ka karKHana hai

yan wahi hai jo e'tibar kiya

ek nawak ne us ki mizhgan ke

taer-e-sidra tak shikar kiya

sad-rag-e-jaan ko tab de baham

teri zulfon ka ek tar kiya

hum faqiron se be-adai kya

aan baiThe jo tum ne pyar kiya

saKHt kafir tha jin ne pahle 'mir'

mazhab-e-ishq iKHtiyar kiya